د ارشاد، حج او اوقافو وزارت له لوري د ۱۴۴۵ هـ ق کال د حاجیانو د معلمینو لپاره تدریب (روزنیز) سیمینار دریم پړاو پیل شو.
شنبه ۱۸ شوال المکرم ۱۴۴۵ هـ ق (۸ ثور ۱۴۰۳ هـ ش)
د ارشاد، حج او اوقافو وزارت له لوري د هېواد په مرکز کابل کې د ۱۴۴۵ هجري قمري کال د حاجیانو د معلمینو لپاره تدریب (روزنیز) سیمینار دریم او اخري پړاو نن په رسمي ډول پیل شو.
ددغه سیمینار د پرانيستې غونډه کې د ارشاد، حج او اوقافو وزارت د عرفان او دیني ځایونو د چارو تنظیم مرستیال شیخ مولوي عزیز الرحمن منصور، د امر بالمعروف او نهې عن المنکر او سمع شکایاتو وزارت کفیل او مسلکي مرستیال شیخ فقیر محمد محمدي، ددې وزارت د مرکزي ریاستونو رئیسانو، علماوو او د سیمینار د دریم پړاو معلمینو گډون کړی وو.
غونډه د قرآن عظیم الشان د څو مبارکو آیتونو په تلاوت سره پیل شوه، ورپسې ددې وزارت د عرفان او دیني ځایونو د چارو تنظیم مرستیال په خپلو عالمانه وینا سره غونډه پیل کړه نوموړي زیاته کړه زه نن ډېر خوشحاله یم چې د افغان حاجیانو لارښونه د داسې خلکو په لاس کې ده چې ټول شیوخ او علماء کرام دي.
ښاغلي منصور وویل: ټول شیوخ او علماء کرام باید له ځان سره دا هوډ ولرئ، چې په حرمینو شریفینو کې مونږ د اسلامي امارت استازي او د حاجیانو معلمین یو.
وروسته د امر بالمعروف او نهې عن المنکر او سمع شکایاتو وزارت کفیل او مسلکي مرستیال د خلوص نیت په موضوعاتو هراړ خیزې تفصیلي خبرې وکړې او زیاته یې کړه چې معلمین دې د حاجیانو خدمت په پوره اخلاص او حسن نیت سره وکړي او دغه کار دې خپل مسؤلیت وگڼي.
همدا زار نوموړي د حاجیانو معلمینو ته په خطاب کې وویل، د حج مناسک مو زده نه وي نو د حج فریضه اداء کولی نشی هغه حاجیان چې د حج فریضې د اداء کولو لپاره ځی دوه فرایض دي لومړی حج فرض دي او دویم د حج پوهه فرض ده نو دغه موضوع تاسو ته راجعه کیږي.
بیا د وزارت د دیني تعلیماتو او تدریب ائمه رئیس مولوي محمد اشرف حقاني خبرې وکړې، نوموړي په خپلو خبرو کې ددې سیمینار په تړاو معلمینو ته معلومات وړاندې کړل او وې وویل: په دې سیمینار کې د کابل د دوویشتو (۲۲) ناحیو سربېره د څلور دېرش (۳۴) ولایتونو هغو معلمینو ته چې له سیمینار څخه پاتې شوي وه سیمینار دائر شو.
د یادونې وړ ده چې یاد روزنیز سیمینار د هېواد په کچه د لویو شیوخو او جیدو علماء کرامو لخوا په درې پړاوونه کې ترسره کېږي، چې لومړی او دویم پړاو یې څه موده وړاندې ترسره شوی وه او دریم پړاو یې نن په رسمي ډول پیل شو چې د یوې اونۍ په ترڅ کې به پای ته ورسېږي او دغه روزنیز سیمینار دوه اساسي برخې لري، چې یوه برخه یې ارشادي او بله یې مسلکي ده.
