د امام ابو منصور الماتريدي د تألیفاتو او شخصیت په اړه ویډیو کنفرانس ترسره شو
شنبه ٢٩ لیندۍ ١٣٩٩
دغه کنفرانس چې د ٢٠ اسلامي هېوادونو د دیني رهبرانو له لوري په لار اچول شوی و، د افغانستان په استازیتوب د ارشاد، حج او اوقافو وزارت د علمي مجمعې رییس سید حجت الله نجیح او د اطلاعاتو او عامه اړیکو رییس فضل محمد حسیني پکې ګډون او خبرې وکړې.
دغه کنفرانس د ازبکستان هېواد د جمهور رییس د مستشار ښاغلي دوكتور سيد روستم قسيموف په وینا پیل شو. ورپسې دوكتور نظير محمد عياد د الازهر شریف نائب شیخ د امام الماتریدي په تألیفاتو او اسلامي خدمتونو رڼا واچوله. له هغه وروسته د ترکیې هېواد د دیني چارو سازمان رییس دوكتور علي ارباش د امام الماتریدي د شخصیت په اړه بحث وکړ. همدارنګه په دغه ویډیویي کنفرانس کې د ازبکستان مفتي اعظم ښاغلي عثمانخان عليموف هم د امام الماتریدی د عظیم شخصیت او مقام په اړه وینا وکړه. ورپسې د اسلامي همکاریو سازمان مدیر دوكتور سيد سالم بن محمد المالك د نوموړي امام پر اخلاقو او ژوند خبرې وکړې. په همدې ترتیب مفتي سید حجت الله نجیح او فضل محمد حسیني د امام الماتریدي د مقام، تألیفاتو او د هغه د شخصیت په اړه هراړخیزې خبرې وکړې، چې د ویډیو کنفرانس ګډون کونکو لخوا یې تود هرکلی وشو.
ددې کنفرانس نورو ګډونوالو هم په خپل نوبت سره د موضوع اړوند خبرې وکړې
