د ارشاد، حج او اوقافو وزارت سرپرست په کابل کې له دارالمعارف اهل بیت مدرسې څخه لیدنه وکړه
د ۱۳۹۹لمریز کال د تلې ۲۱نېټه
نن د ارشاد، حج او اوقافو وزارت سرپرست محمد قاسم حلیمي، د فرهنګي او بشري سرچینو په برخه کې د ولسمشر سلاکار ډاکټر امان الله فصیحي او د وزارت د رهبري هیئت یو شمېر غړو د مذهبونو د نږدېوالي پروګرام د څارلو په موخه د آیت الله العظمی واعظ زاده بهسودي سره ولیدل.
په دغه لېدنه کې چې د اهل تشیع یو شمېر دیني عالمانو، استادانو او ددې مدرسې زده کوونکو هم حضور درلود، د مذهبونو په نږدېوالي، ورورولۍ، ملي انسجام او د دیني عالمانو تر منځ په همغږۍ خبرې وشوې.
په پای کې د هېواد د شعیه ګانو د تقلید مرجع آیت الله العظمی واعظ زاده بهسودي د ارشاد، حج او اوقافو وزارت سرپرست او د وزارت د رهبرۍ غړو له ورتگ څخه د مننې تر څنګ د هېواد اوسنی وضیعت بحراني وباله او زیاته یې کړه، چې د هېواد دښمنان د هېوادوالو تر منځ د بې اتفاقۍ رامنځ ته کولو په موخه له هرې وسیلې او دسیسې څخه کار اخلي، تر څو زموږ د متدینو هېوادوالو تر منځ واټن او نفاق رامنځته کړي. ډېره پر ځای او مناسبه هڅه ده، چې د مذهبونو په نږدېوالي، اتفاق، اتحاد او انسجام کار وشي، تر څو دښمنانو ته د ناسمې گټې اخېستنې چانس په لاس ور نه شي.
