د افغان حاجیانو لومړۍ کاروان نن د سعودی عرب څخه کابل ته راورسېد
۱۶، ذوالحجه ۱۴۴۴ هـ ق (۱۳ سرطان ۱۴۰۲ هـ ش) افغان حاجیانو سږکال پرته له کومي ستونزي د حج مناسک په ښه توګه ترسره کړل او نن بیرته په لومړی کاروان کې، چې د لوګر او لغمان ولایتونو شاوخوا (۳۴۶ ) تنه حاجیان په کې شامل وه، کابل ته را ورسېدل. د کابل په نړیوال هوایي ډګر کې د ارشاد، حج او اوقافو وزارت د یو شمېر رئیسانو او کارکونکو له لوري د ګلونو په ورکولو سره د افغان حاجیانو تود هرکلی وشو. هغه افغان حاجیان چې لومړی سعودي ته رسېدلي وو او له حج اداء کولو څخه مخکې مدینې منورې کې د اتوو شپو او ورځو تیرولو، په نبوي جومات کې د څلویښتو لمونځونو اداء کولو او سپېڅلو زیارتونو کولو وروسته، هغوی به په لومړیو الوتنو کې هېواد ته راستنېږي او کوم حاجیان چې مدینې منورې ته نه دي تللي، مدینې منورې ته به د تلو ورسته هېواد ته را ستانه شي. د يادونې وړ ده چې د ارشاد، حج او اوقافو وزارت او د کام اير هوايي شرکت ترمنځ د فرضي حج سفر او راستنېدو هوکړی په اساس ياد شرکت د (۸۹) الوتنو په ترڅ کې د ذوالقعدې له لومړی نېټې څخه ذوالحجې تر ۳ مې نېټي پورې (۳۰) زره حاجیان د مرکز، کندهار، بلخ او هرات زونونو له لارې سعودي عربستان ته انتقال کړل. او له دې وروسته به هم یاد شرکت د افغانستان حاجیان په ترتیب سره هېواد ته راستانه کړي.
