د قراءاتو د عالي معهد د لومړۍ او د قرآن کریم د حفظ او تجوید حلقې د دوېیمې دورې د فراغت غونډه
دوشنبه ١٠ لیندۍ
کابل، افغانستان: نن د قراءاتو د عالي معهد د لومړۍ او له خصوصي دارالحفاظو څخه د قرآن کریم د حفظ او تجوید حلقې د دوېیمې دورې زده کړیالانو د فراغت غونډه د شانداره مراسمو په ترڅ کې ولمانځل شوه. په دغو مراسمو کې د ارشاد، حج او اوقافو وزارت د رهبري هیأت، علماء کرامو، د الازهر پوهنتون استادانو او د خصوصي مدرسو مسؤلینو ګډون کړی و.
غونډه د قرآن کریم د څو مبارکو ایتونو په تلاوت سره پیل شوه.
په پیل کې شیخ القرآن قاري برکت الله سلیم مېلمنو ته د ښه راغلاست ترڅنګ د قاریانو چارو د انسجام ریاست برنامې تشریح کړې. ورپسې د ارشاد، حج او اوقافو وزارت مسلکي معین دوکتور آمین الدین مظفري د خپل ګټور او اغېزمن بیان ترڅنګ ددې وزارت د رهبري هیأت په استازیتوب د فارغینو د اهدافو په ترلاسه کولو کې د همکارۍ ژمنه وکړه او غوښتنه یې وکړه، چې خپلو لوړو زده کړو ته دوام ورکړي. له هغه وروسته په کابل کې د الازهري بعثې رییس دوکتور ایمن صلاح، په فصیحه عربي ژبه د قراء سلف د ځواک او وړتیا عجایب بیان کړه.
په دې لویه غونډه کې د ګډونوالو لپاره د ویناوو ترڅنګ د حُسن قراءت برنامه هم په شامله وه، چې د پروګرام په جریان کې په مقطعي ډول وړاندې شوه.
د غونډې په دوام د ښځو چارو وزارت د پالیسۍ مرستیالې آغلې سپوږمۍ وردګ د عدالت او د ارشاد ، حج او اوقافو وزارت د اصلاحي برنامو په اړه خبرې وکړې او د قاریه خویندو لپاره یې د مدرسو په برخه کې د وزارت له پاملرنې مننه وکړه او خوښي یې څرګنده کړه.
ورپسې دوه تنه فارغانو د نارینه او ښځینه په استازیتوب خبرې وکړې، د وزارت له مشرتابه او د دوی له تعلیمي مسؤلینو مننه وکړه او له دې لارې یې دین او خپلو هېوادوالو ته د خدمت چمتووالی وښود.
ورپسې د مصالحې عالي شورا غړې شاه ګل رضايي خبرې وکړې. نوموړې د خپلو عالمانه ویناوو ترڅنګ د ارشاد، حج او اوقافو وزارت د رهبرې او د قرآن ستورو له دې ارزښتمنو برنامو او خدمتونو مننه وکړه.
د غونډې په پاي کې د ارشاد، حج او اوقافو وزارت رهبري هیأت، سیاسي شخصیتونو، علماء کرامو، د قراءاتو د عالي معهد او د دارالحفاظو د استادانو له لوري فارغانو ته د فضیلت پګړۍ ور په سر شوې او د فراغت سندونه او ستاینلیکونه ورکړل شول.
د یادونې وړ ده چې پدې غونډه کې د کابل د 38 خصوصي دارالحفاظو فارغینو د فراغت سند ترلاسه کړ. همدارنګه د دارلحفاظو او مدرسو مسؤلینو ته هم د ارشاد، حج او اوقافو وزارت له لوري ستاینلیکونه ورکړل شول.
غونډه په هېواد کې سرتاسري سولې او امنیت په دعاء پای ته ورسېده.
د یادونې وړ ده، چې په دغه فراغت غونډه کې (١٨) اتلس تنه د قراءاتو د عالي معهد انسټیټوټ زده کړیالان او د خصوصي دارالحفاظو او مدرسو ٤٨٢ کسان شامل و، چې (١٣٠) تنه انجونې او (٣٥٢) تنه هلکان ول.
