د کندهار ولایت د ارشاد، حج او اوقافو رییس ښاغلي محمد عمر اخندزاده باندې د ترورستي برید په تړاو د ارشاد، حج او اوقافو وزارت اعلامیه!
نن سهار د هېواد او دین قسم خوړلو دښمنانو د هېواد جید عالم او د کندهار ولایت د ارشاد، حج او اوقافو رییس ښاغلي محمد عمر اخندزاده پر موټر باندې تروریستي برید ترسره کړ، چې په پایله کې یې نوموړي ټپي او د هغه ډرېور شهید شو.
انا لله و انا الیه راجعون
د ارشاد، حج او اوقافو وزارت رهبري هيئت د یادې پېښې شهید ته فردوس جنت او ښاغلي اخند زاده د الله تعالی له دربار څخه عاجله شِفاء او له کورنیو سره یې په دې غم کې ځان شریک بولي.
ښاغلی محمد عمر اخند زاده د کندهار ولس معزز، خدمتګار دی او د شکر ځای دی چې له دې وحشیانه بریده روغ وتلی دی.
دا چې په هېواد کې د سولي خبري حساس پړاو کې رواني دي د ارشاد، حج او اوقافو وزارت رهبري هيئت په دیني عالمانو او بې ګناه وګړو دا ډول غیر اسلامي او وحشیانه بریدونه چې هيڅ ديني توجيه نه لري په کلکو ټکو غندي.
هيله لرو، چې دپيښي عاملين د امنيتي او کشفي ادارو له لوري د قانون منګولو ته وسپارل شي، ترڅو دخپلو اعمالو په سزا ورسيږي .
محمد قاسم حلیمي
د ارشاد، حج او اوقافو وزير
