د ارشاد، حج او اوقافو وزیر او د حج بعثې عمومي رئیس د کعبې شریفې د پوښ جوړولو له لوی مرکز څخه لیدنه وکړه
۲۱ ذوالحجة ۱۴۴۴هـ ق(۱۸ سرطان ۱۴۰۲ هـ ش)
د افغانستان اسلامي امارت د ارشاد، حج او اوقافو وزیر او د حج بعثې عمومي رئیس شیخ الحدیث دکتور مولوي نور محمد ثاقب د دغه وزارت د یو شمير رئیسانو په ملتیا د کعبې شریفې د غلاف (پوښ) جوړولو د مرکز د مسوؤلينو په رسمي بلنه د مجمع الملک عبدالعزیز لکسوة الکعبة المشرفة څخه لېدنه وکړه.
د کعبې شریفې د پوښ جوړولو د مرکز د مشر ښاغلي احمد بن مساعد الْسوَيهري لخوا ښاغلي وزیر ته د ښه راغلاست ترڅنګ تود هرکلی وشو.
د ارشاد، حج او اوقافو وزير او ورسره مل پلاوي د كعبې شریفې د غلاف جوړولو د دغه ځای له بېلابېلو برخو څخه د لېدنې په ترڅ کې د کعبې شریفې د پوښ (کسوة ) جوړولو د مشر په غوښتنه ښاغلي ثاقب د کعبې شریفې د پوښ په ګنډلو کې برخه واخیسته او په خپلو لاسونو یې څو د سروزرو تارونو ټکونه له مبارک پوښ څخه وویستل.
په دي کتنه کې د دغه ځای د مشر لخوا ښاغلي ثاقب ته د کعبې شریفې د پوښ جوړولو او په کې کاریدونکو خامو موادو چې د پوښ په جوړولو او ښکلا کې کارول کیږي تفصیلي معلومات ورکول شول.
د افغانستان د اسلامي امارت د ارشاد، حج اوقافو وزیر دکتور مولوي نورمحمد ثاقب د کعبې شریفي د پوښ جوړولو د دغه مرکز د کارکوونکو له خدمتونو څخه مننه وکړه او دوی ته یې د لا زیات توفیق هيله څرګنده کړه.
