د ارشاد، حج او اوقافو وزارت له لوري د ۱۴۴۵ هـ ق کال د حاجیانو د معلمینو لپاره تدریب (روزنیز) سیمینار پیل شو
۲۰ شعبان المعظم ۱۴۴۵ هـ ق (۱۲ حوت ۱۴۰۲ هـ ش)
نن شنبه د ارشاد، حج او اوقافو وزارت له لوري دهېواد په پلازمینه کابل کې د ۱۴۴۵ هجري قمري کال د حاجیانو د معلمینو لپاره تدریب (روزنیز) سیمینار په رسمي توگه پیل شو، یاد روزنیز سیمینار درې پړاوونه لري، چې هر پړاو به یې د شپږو ورځو په موده کې ترسره کېږي.
دغه روزنیز سیمینار دوه اساسي برخې لري، چې یوه برخه یې ارشادي او بله یې مسلکي ده.
ارشادي برخه يې د هېواد د شیوخو او جیدو علماء کرامو له لوري تدریس کېږي او مسلکي برخه یې ددې وزارت د مسلکي استاذانو له لوري پرمخ وړل کېږي.
د حاجیانو د معلمینو په سیمینار کې معلمینو ته د حج د مناسکو او ضروري مسایلو د ښوونې ترڅنگ، د حج په پروسه کې صبر، تحمل او په رښتنې جذبه خدمت کول، د مسؤلیت احساس او په خپله وعده وفا کول، د حج د پروسې اړوند معاصرو عربي لغاتو زده کړه، د دوی د دندو د لایحې تشریح، په پروازونو کې د معلمینو په ښه توگه د تنظیمولو د چارو ښوونه، د حج په پروسه کې د اطاعت ضرورت په هېواد کې دننه او دغه راز په سعودي عربستان کې حاجیانو ته درسي حلقات دائرول، د شرعي احکامو او دغه راز د سعودي حکومت د وضع شوو مقرراتو پابندي کول او داسې نور موضوعات وړاندې کېږي.
ددغه سیمینار د پرانيستې غونډه کې د ارشاد، حج او اوقافو وزارت اداري او مالي مرستیال مولوي عارف الله عارف، ددې وزارت د مرکزي ریاستونو رئیسانو، علماوو او د سیمینار د لومړي پړاو معلمینو گډون کړی وو.
غونډه د قرآن عظیم الشان د څو مبارکو آیتونو په تلاوت سره پیل شوه، ورپسې ددې وزارت اداري او مالي معین د خپلو خبرو په ترڅ کې ټولو هغو علماء کرامو ته چې د آزموینې په پایله کې د معلمینو په توگه انتخاب شوی مبارکي وویله او زیاته یې کړه، چې د حاجیانو معلمي یو لوی مسؤلیت دی نو تاسو باید دغه مسؤلیت په ښه توگه اداء کړئ، ځکه چې حاجیان ضیوف الرحمن دي او د دوی خدمت په مونږ او تاسو لازم او ضروري دی او دا زمونږ لپاره یو لوی افتخار هم دی.
نوموړي وویل: د ارشاد، حج او اوقافو وزارت د رهبرۍ تر نظر لاندې معلمینو ته ځانگړی درسي نصاب تیار شوی دی چې د حج اړوند دیني مسائلو او موضوعاتو سربېره ددې وزارت د حج د ټولو کمېټو د طرزالعمل لایحې هم په کې تشریح شوې دي.
ورپسې شیخ عبدالفتاح حقاني د خلوص نیت په موضوع باندې هراړ خیزې تفصیلي خبرې وکړې.
بیا د وزارت د دیني تعلیماتو او تدریب ائمه رئیس مولوي محمد اشرف حقاني خبرې وکړې، نوموړي په خپلو خبرو کې ددې سیمینار په تړاو معلمینو ته معلومات وړاندې کړل او وې وویل: د مرکزي زون (کابل ، کونړ، نورستان، لغمان، کاپیسا، میدان وردگ، ننگرهار، غزني، خوست او پکتیکا) ولایتونو د حجاج کرامو معلمینو ته د هېواد په کچه د لویو شیوخو او جیدو علماء کرامو لخوا د یوې اونۍ په ترڅ کې دغه روزنیز سیمینار ترسره کېږي چې د نورو ولایتونو معلمینو ته به په دویم او دریم پړاو کې هم دغه روزنیز سیمینار ترسره شي.
