د ارشاد، حج او اوقافو وزیر تر مشرۍ لاندی په مدینه منوره کې د حج بعثې غونډه تر سره شوه

سه شنبه ۲۶ ذوالحجة الحرام ۱۴۴۵ هـ ق ( ۱۲ سرطان ۱۴۰۳ هـ ش)

سعودي عربستان، مدینه منوره: د ارشاد، حج او اوقافو وزیر او په سعودي عربستان کې د حج بعثې عمومي رئیس شیخ الحدیث سرمحقق قضاوتپوه دکتور مفتي نورمحمد ثاقب تر مشرۍ لاندې افغان حاجیانو ته د غوره او پر وخت خدمتونو د وړاندې کولو د ادامې په تړاو غونډه ترسره شوه.

په یاده غونډه کې د مدینې منورې د حج بعثې مسؤل او د وزارت مسلکي مرستیال شیخ الحدیث زرمحمد حقاني، په سعودي عربستان کې د حج قونسل شیخ ګل رحمن مدني او د حج کاري کمېټو مسؤولینو گډون کړی وو.

غونډه د قرآن عظیم الشان د څو مبارکو آیتونو په تلاوت سره پیل شوه، ورپسې د ارشاد، حج او اوقافو وزیر پرانیستې وینا وکړه او زیاته یې کړه، چې ډېر افغان حاجیان مدینې منورې ته را رسېدلي دي، چې ټولې کاري کمیټې باید په خپل وخت حاجیانو ته خدمات وړاندی کړي تر څو عبادت او زیارتونه په ارامه فضاء کې ترسره کړي

ښاغلی ثاقب وویل : په مدینه منوره کې د حاجیانو لپاره ټول خدمات باید لاښه کړی شي او د حج پروسې تر پایه باید همداسې دوام پیدا کړي او له پلان سره سم باید د مدینې منورې څخه حاجیان بیرته په منظم ډول د هېواد څلورو واړو پروازي زونونو ته د آریانا افغان او کام ایر هوایي شرکتونو له لوري انتقال ترسره شي.

ورپسې د وزارت مسلکي مرستیال شیخ الحدیث زرمحمد حقاني خبرې وکړې نوموړي په خپلو خبرو کې زیاته کړه چې په مدینه منوره کې افغان حاجیانو ته په منظم ډول د ټولو کاري کمیټو له لوري خدمات وړاندې کیږی او ټول مسؤلین کوښښ کوي چې دا لړي د الله په توفیق او نصرت همداسې دوام پیدا کړي

ورپسې د ټولو کاري کميتو ( مناسک، تغذیه، ترانسپورت، صحت، مفقودین، تسکین، ترحیل، ارتباط خارجه او هوائی ډګر) مسؤلینو د خپلو فعالیتونو ګزارش او وړاندیزونه د وزارت مقام سره شریک کړل .

دغونډې پای کې د کارونو د ښې چټکتیا او موثریت په خاطر د وزارت د مقام له لوري په بېلا بېلو برخو کې لارښونې ترسره او لازم  تصامیم ونیول شول

غونډه د دعائیې په لوستلو سره پای ته ورسیده.