د ارشاد، حج او اوقافو وزیر د هېواد د بېلا بېلو ولایتونو له علماوو سره دخپل کار په دفتر کې وکتل
سه شنبه ۲۶ ربیع الثاني ۱۴۴۶ هـ ق (۸ عقرب ۱۴۰۳ هـ ش)
د ارشاد، حج او اوقافو وزیر شیخ الحدیث سرمحقق دکتور نورمحمد ثاقب نن په جلا جلا کتنو کې د کاپیسا ولایت د جهادی مدرسې استاذانو، د ولایتې شورا علماء کرامو او د بامیانو ولایت څخه د استاد محمد اکبري تر مشرۍ لاندې راغلو د اهل تشیع او تسنن له علماء کرامو سره په خپل کاري دفتر کې وکتل.
په پېل کې د ارشاد، حج او اوقافو وزیر خبرې وکړي او زیاته یې کړه: علماء کرام د ټولنې د پوهې او اصلاح سمبولونه دي او دوی د ټولنې په یووالي او اتحاد کې خورا مهم رول لري او دوی د دیني اصولو او احکامو په رڼا کې خلکو ته لارښوونې کوي او د دیني مسایلو په اړه یې زده کړو ته هڅوي.
نوموړي وویل: علماء کرام په ټولنه کې د نیکو ارزښتونو د پیاوړتیا او د ناسمو باورونو لمنځه وړلو لپاره کار کوي، او خلک د ورورولۍ، صداقت او درناوي اصولو ته را بولي.
ښاغلي ثاقب زیاته کړه، د ارشاد، حج او اوقافو وزارت دجوماتونو، حُسَینیو او خانقاوو د ترمیم او ودانولو په برخه کې جدي اقدامات کوي او مونږ په دې لټه کې یو چې هغه جوماتونه او عبادت ځایونه چې لا رسمي نه دي رسمي کړو او دخطیبانو، امامانو، مؤذنینو او خادمېنو په بستونو کې زیاتوالي راولو ترڅو دوی وکولی شي په ښه او مؤثره توګه د دیني او اخلاقي ارزښتونو د پیاوړتیا لپاره کار وکړي.
ورپسې د کاپیسا او بامیانو ولایتونو علماء کرامو په خپلو خبرو کې دارشاد، حج او اوقافو وزارت د بیلا بیلو برخو د کارونو ستاینه وکړه.
دوی وویل: د جوماتونو او عبادت ځایونو جوړول، ترمیمول او همدارنکه دعلماوو لپاره د بستونو زیاتول د دیني خدماتو په ترسره کولو کې ارزښتناک ګامونه بلل کیږي.
د لیدنو په پای کې د ارشاد، حج او اوقافو وزیر راغلو علماء کرامو ته د هر ډول همکارۍ ډاډ ورکړ او وعده یې وکړه چې اسلامي امارت به د دیني او علمي فعالیتونو د پیاوړتیا لپاره د علماوو هر اړخیزه مرسته او حمایت کوي.
دغه ناسته د دعائېي په لوستلو سره پای ته ورسېدله.
