د ارشاد، حج او اوقافو وزیر په کابل کې د ترکیې هیواد د لوړ پوړو چارواکو سره ولیدل
د ارشاد، حج او اوقافو وزیر شیخ الحدیث سرمحقق قضاوتپوه دکتور مفتي نورمحمد ثاقب د ترکیې هېواد د دیني چارو ریاست له مرستیال ښاغلي پوهنوال سلیم ارگون او مل پلاوي سره په خپل کاري دفتر کې وکتل.
د لیدنې په پیل کې د ارشاد، حج او اوقافو وزیر راغلو میلمنو ته ښه راغلاست ووایه او زیاته یې کړه چې د ترکیې هېواد د علماوو او لوړ پوړو چارواکو راتګ افغانستان ته د اسلامي امارت سره د دوامداره تعامل او همکاريو ښکاروندیي کوي، ښاغلي ثاقب په خپلو خبرو کې ترکیې هېواد ته د خپل وروستي سفر یادونه هم وکړه او وې ویل په اسلامي نړۍ کې د ترکیې هیواد نقش مهم او ارزښتمن دی او د استانبول په تاریخي ښار کې د اسلامي هېوادونو د علماوو مشورتي کنفرانس د دغه نقش او همکاریو ښکاره مثال دی
نوموړي په اسلامي نړۍ کې د مسلمانانو د یووالي او د ستونزو د حل لپاره د اسلامي هېوادونو د دغه شان ګډو هڅو د دوام غوښتنه وکړه.
ورپسې د ترکیې هېواد د دیني چارو مرستیال ښاغلي سلیم ارګون په افغانستان کې د اسلامي امارت د وروستیو پرمختګونو او لاسته راړونو ستاینه وکړه او زیاته یې کړ دواړه اسلامي او دوست هېوادونه په دیني ،کلتوري او مذهبي چارو کې ورته والی لري . او د اړیکو د لا ټینګښت او پراختیا لپاره باید د دواړو هېوادونو استازي یو له بل سره لیده کاته نور هم زیات کړي. نوموړي په خپلو خبرو کې زیاته کړه چې د ترکیې په ګډون ټول اسلامي هېوادونه باید له اسلامي امارت سره په بېلا بیلو برخو کې همکاریو ته دوام ورکړي.
د ارشاد، حج او اوقافو وزیر د راغلو میلمنو له څرګندونو او د افغانستان په اړه د دوی د مثبت دریځ څخه مننه وکړه او زیاته یې کړه الحمدلله په افغانستان کې اسلامي او شرعي نظام قایم دی، د ټولو اسلامي هېوادونو او په ځانګړې توگه د ترکیې هېواد سره د ښو مثبتو او دوامداره اړیکو غوښتنه کوو.
