د افغانستان ارشاد، حج او اوقافو وزیر د سعودي عربستان د حج او عمرې د وزارت لخوا د (ختامه مساك) ترعنوان لاندې په جوړه شوې غونډه کې ګډون وکړ
۱۲ ذوالحجة ۱۴۴۴هـ ق مطابق ۹ د سرطان ۱۴۰۲هـ ش د افغانستان اسلامي امارت د ارشاد، حج او اوقافو وزیر او په سعودي عربستان کې د حج د بعثې عمومي رئیس شیخ الحدیث دکتور مولوي نورمحمد ثاقب د سعودي عربستان د حج او عمرې وزارت په رسمي بلنه په هغه غونډه کې ګډون وکړ چې د سعودي عربستان د حج او عمرې وزارت لخوا جوړه شوې وه. د سعودي عربستان د حج او عمرې وزارت د حج د پروسې په بریالیتوب سره د پای ته رسېدو وروسته د (ختامه مساك) ترعنوان لاندې ځانګړي غونډه جوړه کړې وه چې د افغانستان د اسلامي امارت د ارشاد، حج او اوقافو وزیر برسیره د ډیرو اسلامي هېوادونو د حج او اوقافو وزیرانو په کې ګډون درلود. په دغه غونډه کې د سعودي عربستان د حج او عمرې وزیر دکتور توفيق بن فوزان الربيعة د افغانستان د ارشاد، حج او اوقافو وزیر شیخ الحدیث دکتور مولوی نورمحمد ثاقب څخه په مکه مکرمه کې د افغان حاجیانو د ښه تنظیم اورهبرۍ ستاینه وکړه چې د افغانستان د ارشاد، حج او اوقافو وزیرهم د سعودي عربستان د حج اوعمرې وزارت او اړوندو ادارو څخه سږ کال افغان حاجیانو ته په مکه مکرمه او مدینه منور کې د غوره خدمتونو او اسانتیاوو رامنځ ته کولو څخه مننه وکړه. ترغونډې وروسته د افغانستان د ارشاد، حج او اوقافو وزیر د سعودي عربستان د حج او عمرې له وزیر دکتور توفيق بن فوزان الربيعة سره په ځانګړی لېدنه کې د راتلونکي کال د افغان حاجیانو لپاره د لا ډیرو اسانتیاوو په رامنځ ته کولو بحث وکړ او د راتلونکي کال د حج په اړه یې خبرې ترسره کړې.