د افغان حاجیانو لومړنۍ الوتکه تیره شپه د کابل نړیوال هوايي ډګر ته را ورسیده
شنبه ۱۵ ذوالحجة الحرام ۱۴۴۵ هـ ق (۲ سرطان ۱۴۰۳ هـ ش)
د حج د مناسکو د اداء کولو وروسته له سعودي عربستان څخه د افغان حاجیانو لومړنۍ الوتکه تیره شپه د کابل نړیوال هوايي ډګر ته په داسې حال کې را ورسیده چې د افغانستان اسلامي امارت د ارشاد، حج او اوقافو وزارت مالي او اداري مرستیال مولوي عارف الله عارف، د عرفان او دیني ځایونو د چارو تنظیم مرسیتال شیخ عزیزالرحمن منصور د اسلامي امارت لوړپوړو چارواکو، امنیتي مسئولینو، د کابل نړیوال هوايي ډګر، د آریانا افغان او د کام ایر هوايي شرکتونو او د وزارت یو شمېر مسئولینو د حاجیانو راتللو ته د گلانو په ورکولو سره هرکلی وویلو.
د ارشاد، حج او اوقافو وزارت مرستیال ښاغلي منصور حاجیانو ته د ښه راغلاست ترڅنګ وویل: د شکر ځای ده چې زمونږه حاجیان په خیر او سلامتۍ سره بېرته خپل هېواد ته راستانیږي.
نوموړي زیاته کړه د ارشاد، حج او اوقافو وزارت او اړوندو ادارو په همکارۍ سږ کال سعودي عربستان ته د آریانا افغان او کام ايرهوایي شرکتونو د (۹۴) پروازونو په ترڅ کې پوره (۳۰۰۰۰) دیرش زره حاجیان پرته له کومې ستونزې حرمینوشریفینو ته انتقال کړي وو، چې نن يې الحمدلله د لومړی پرواز د بېرته راستنیدو شاهدان یو او په دغه سلسله به د افغان حاجیانو د بېرته راتګ بهیر کې کوښښ کوو چې د خنډ او ځنډ پرته د پلان شوي مهالویش سره سم په ټاکلي وخت سره ټول افغان حاجیان خپل هیواد ته راستانه کړو.
په ورته مهال افغان حاجیانو په حرمینو شریفینو کې په مختلفو برخو کې د خدماتو له وړاندې کولو څخه خوښي څرگنده وله.
د یادونې وړ ده چې د حاجیانو د انتقال لړۍ به د کابل ترڅنگ نورو زونونو ته هم پیل شي.
