د ارشاد، حج او اوقافو وزیر د فلسطین له قاضي القضات سره د ویډیو کنفرانس له لارې خبرې وکړې
چهارشنبه ٢١ سلواغې ١٣٩٩
کابل: نن د ارشاد، حج او اوقافو وزیر محمد قاسم حلیمي د فلسطین له قاضي القضات او د ولسمشر سلاکار دوکتور محمودالهباش سره د ویډیو کنفرانس له لارې په افغانستان کې د روان جنګ د پای ته رسولو او د سولې په اړه خبرې وکړې.
په دغه کنفرانس کې د فلسطین لپاره په اُردن کې د افغانستان سفیر طارق شاه بهرامي او په ازبکستان کې د افغاسنتان لپاره د فلسطین سفیر هم ګډون کړی و.
په پیل کې د ارشاد، حج او اوقافو وزیر محمد قاسم حلیمي خبرې وکړې. نوموړي قدس د مسلمانانو لومړۍ قبله او درېیم حرم یاد کړ. هغه زیاته کړه، چې افغانستان له فلسطین سره ډېرې نږدې مذهبي او پخوانۍ اړیکې لري او په بیت المقدس کې د افغانستان په نوم د یوې وقفي زاویې موجودیت چې په ١٠٤٣ ه ق کال کې جوړه شوې ده د اوږدو تاریخي اړیکو ښکارندویي کوي.
ښاغلي حلیمي زیاته کړه: لکه څنګه چې د نړۍ نورو اسلامي هېوادونو او د دیني مرکزونو علماوو په افغانستان کې روانه جګړه ناروا بللې وه د قدس له مفتي څخه مننه وکړه، چې دوی هم د افغانستان جګړه ناروا او ورور وژنه یاده کړې ده.
نوموړي همداراز وویل، چې موږ د نړۍ له ټولو اسلامي هېوادونو سره د ښو اړیکو غوښتونکي یو او فلسطین زموږ لپاره ځانګړی اهمیت لري.
ورپسې د فلسطین قاضي القضات او د ولسمشر سلاکار ښاغلي دوکتور محمود الهباش خبرې وکړې او د فلسطین د ولسمشر ښاغلي محمود عباس سلامونه او نېکې پېرزوینې یې د افغانستان ولس ته وړاندې کړې.
ښاغلي الهباش افغانستان او فلسطین ورونه هېوادونه یاد کړل او له افغانانو څخه یې مننه وکړه، چې تل یې د بیت المقدس څخه په ملاتړ خپل غږ پورته کړی.
نوموړي هم د نورې اسلامي نړۍ د دیني علماوو په څېر په افغانستان کې د افغانانو ترمنځ روانه جګړه ورور وژنه یاده کړه او زیاته یې کړه، چې دا ډول جګړې هيڅ ډول دیني توجیه نلري.
ښاغلي الهباش په افغانستان کې د جګړې په ښکېلو اړخونو غږ وکړ، چې د خبرو او مذاکراتو له لارې دا جګړه پای ته ورسوي، ښکېلې خواوې دې ولس ته مراجعه وکړي او د ټولټاکنو په پایله کې دې یو قوي او مرکزي حکومت رامنځته کړي. ښاغلي الهباش وویل، چې موږ تل د افغانانو تر څنګ ولاړ یو او یو با ثباته افغانستان د ټولې اسلامي نړۍ لپاره یو قوت دی.
د پروګرام په پای کې د دواړو هېوادونو لپاره سفیرانو هم د اړیکو په پیاوړتیا او په دیني برخه کې د همکاریو د زیاتېدو ژمنه وکړه.