د ارشاد، حج او اوقافو وزارت مسلکي مرستیال اطلاعاتو ته د لاسرسي کمېسیون د دارالانشا له رییس سره وکتل
شنبه د کب ۱۶مه، ١٣٩٩
دا چې اطلاعاتو ته د لاسرسي کمېسیون؛ هېوادوالو ته د ټولو حقونو، اطلاعاتو ته د لاسرسي حق په ګډون د عالمانو رول مهم بولي. د افغانستان عالمان، د اسلامي ښوونو پر بنسټ، اطلاعاتو ته د لاسرسي حق او قانون دودولو او عامولو په برخه کې ښه لارښوونه کولای شي. کمېسیون، په ځواب ویونکي او ولسواکي دولت کې اطلاعاتو ته د لاسرسي دود پیاوړتیا او عامولو په برخه کې د عالمانو همکارۍ باندې باور لري.
په همدې اساس د ارشاد، حج او اوقافو وزارت مسلکي مرستیال دوکتور امین الدین مظفري اطلاعاتو ته د لاسرسي کمېسیون د دارالانشا رییس ښاغلي عصمت الله حیدري سره د ګډو همکاریو پیاوړتیا، د کابل او ولایتونو د عالمانو په واسطه اطلاعاتو ته د لاسرسي حق په اړه د کنفرانسونو ترسره کولو په پار ناسته وکړه.
په پیل کې ښاغلي حیدري، اطلاعاتو ته د لاسرسي حق تامینولو، دود او پیاوتیا په برخه کې د علماو رول باندې خبرې وکړې او زیاته یې کړه؛ اطلاعاتو ته د لاسرسي کمېسیون په پام کې لري، چې کابل او د هېواد په ۲۰ ولایتونو کې اطلاعاتو ته د لاسرسي دود عامولو او پیاوړتیا لپاره د عالمانو له لارې د پوهاوي پروګرامونه ترسره کړي. ښاغلي حیدري د هېوادوالو له پاره اطلاعاتو ته د لاسرسي حق تامینولو په برخه کې د ارشاد، حج او اوقافو وزارت له مشرتابه د همکارۍ غوښتنه وکړه.
ورپسې د ارشاد، حج او اوقافو وزارت مسلکي مرستیال دوکتور امینالدین مظفري اطلاعاتو ته د لاسرسي کمېسیون کړنې او فعالیتونه وستایل او اطلاعاتو ته د لاسرسي حق په هکله له دیني اړخه خبرې وکړې. نوموړي وویل: « هم په دین او هم په وضع شویو بشري قوانینو کې قدرت د وګړو دی او حکومت یې د وګړو استازولي په ټولنه کې تمثیل کوي؛ په همدې اساس د اطلاعاتو اصلي څښتنان وګړي دي او ادارې مکلفې دي چې اطلاعات د وګړو په واک کې ورکړي». نوموړي زیاته کړه، له نېکهمرغه د ارشاد، حج او اوقافو وزارت اطلاعاتو ته د لاسرسي حق تامین ته ژمن دی او په دې برخه کې اطلاعاتو ته د لاسرسي کمیسیون سره هر ډول همکاریو ته چمتو دی.
