د شعبان او رمضان په میاشتو کې د قرآن کریم د ترجمو او تفسیر د دورو په هکله اطلاعیه
د افغانستان اسلامي امارت د ارشاد، حج او اوقافو وزارت په پام کې لري چې د تیر کال په څېر د روان ۱۴۴۴ هـ ق کال د شعبان المعظم او رمضان المبارک په میاشتو کې د هېواد په نظامي مراکزو او دغه راز په ملي راډیو تلویزیون کې په پښتو او دري ژبو د قرآن کریم د ترجمو او تفسیر دورې ترسره کړی.
ددغو چارو د سرته رسولو لپاره د افغانستان اسلامي امارت د ارشاد،حج او اوقافو وزارت د سرپرست شیخ الحدیث دکتور مولوی نورمحمد ثاقب په مشرۍ د وزارت د رهبرۍ په کچه یوه کمیټه له تیرو څو اونیو راهیسې په مرکز او ولایاتو کې د هیواد له شیوخو او جیدو علماء کرامو سره په اړیکو او د ترجمو د ځایونو په تنظیم بوخت دي او له پرلپسې مجلسونو او مشورو وروسته پریکړې وشوې چې د مرکز کابل په ګډون به د ټول هېواد په دوه سوه او دوه (۲۰۲) نظامي ځایونو کې او دغه راز په ژوندۍ بڼه په ملي راډیو تلویزیون کې د قرآن کریم د ترجمې او تفسیر دورې ترسره کیږي .
