د ارشاد، حج او اوقافو سرپرست وزیر د غزني ولایت څخه لیدنه وکړه.
(۱۱) جمادی الأولی (۱۴۴۳) هـ ق مطابق (۲۵) قوس(۱۴۰۰) هـ ش
د افغانستان اسلامي امارت د ارشاد، حج او اوقافو وزیر شیخ الحدیث مولوي نورمحمد «ثاقب» په مشرۍ لوړ پوړي پلاوي غزني ولایت ته د سفر پرمهال ددې ولایت د ارشاد، حج او اوقافو ریاست څخه لیدنه وکړه.
ښاغلي «ثاقب» د غزني ولایت د ارشاد، حج او اوقافو ریاست له سرپرست مولوي عبدالمنان مدني او نورو کارکوونکو سره دکتلو په جریان کې د هغوی کارونه او فعالیتونه وارزول او د کارونو د لاپرمختګ په خاطر یې په بیلا بیلو برخو کې لازمې لارښوونې او سپارښتنې وکړې.
دغه راز د ارشاد، حج او اوقافو سرپرست د ریاست د غوڼډو په تالار کې د غزني ښار د یو شمیر اهل تسنن او اهل تشیع مخورو علماوو سره غونډه تر سره کړه.
لومړی د راغلو علماء کرامو په نمايندګې مولوي حاجي محمد، دمحترم وزیر په مشرۍ پلاوي ته هر کلې ووایه او زیاته یې کړه چې شیخ صاحب دغه ریاست ته په خپلو راتللو سره د وزیرانو د راتلو بنیاد کېښود.
ورپسې ښاغلي «ثاقب» د اسلامي امارت د تګلارو، اهدافو او مقاصدو په اړه هغوی ته عالمانه او هر اړخیزه وینا واوروله، چې د حاضرینو د زیاتی خوښۍ سبب وګرځېده
د دې سر بیره د ارشاد، حج او اوقافو وزير د دغه ولایت سرپرست والي مولوي محمد اسحاق اخندزاده او د ولایت نورو کارکوونکو سره هم وکتل او په مختلفو موضوعاتو یې خبرې او مشورې وکړې.
