د افغانستان د ارشاد، حج او اوقافو وزیر د سعودي عربستان د حج او عمرې وزارت لخوا د ختامه مسک ترعنوان لاندې په جوړه شوې غونډه کې گډون وکړ
سه شنبه ۱۲ ذوالحجة الحرام ۱۴۴۵ هـ ق (۲۹ جوزا ۱۴۰۳ هـ ش)
د ارشاد، حج او اوقافو وزیر او په سعودي عربستان کې د حج بعثې عمومي رئیس شیخ الحدیث سرمحقق قضاوتپوه دکتور مفتي نورمحمد ثاقب د سعودي عربستان د حج او عمرې وزارت په رسمي بلنه په هغه غونډه کې ګډون وکړ چې ددې هېواد د حج او عمرې وزارت لخوا جوړه شوې وه. د سعودي عربستان د حج او عمرې وزارت د حج د مناسکو په بریالیتوب سره د پای ته رسېدو وروسته د (ختامه مسک) ترعنوان لاندې په ځانگړې غونډه کې د افغانستان اسلامي امارت د ارشاد، حج او اوقافو وزیر ترڅنگ د نورو ډیرو اسلامي هېوادونو د حج او اوقافو وزیرانو پکې گډون درلود، چې په کې د سعودي عربستان د حج او عمرې وزیر دکتور توفيق بن فوزان الربيعة د اسلامي هېوادونو له وزیرانو څخه په مکه مکرمه کې د حاجیانو د ښه تنظیم او رهبرۍ ستاینه وکړه چې په مقابل کې یې د ټولو اسلامي هېوادونو د بعثې مشرانو هم د سعودي عربستان د حج او عمرې وزارت او اړوندو ادارو څخه په سږني کال کې د حاجیانو لپاره په مکه مکرمه او مدینه منور کې د غوره خدمتونو او اسانتیاوو رامنځ ته کولو په تړاو مننه وکړه. په غونډه کې د سعودي عربستان د حج او عمرې وزیر په رسمي ډول د نورو هېوادونو ترڅنګ د افغانستان اسلامي امارت د ارشاد، حج او اوقافو وزیر ته د راتلونکي کال د حج وثیقه او تفصیلي برنامه وسپارله او دواړو لورو د راتلونکي کال د حج په موسم کې د افغان حاجیانو لپاره د لازیاتو اسانتیاوو په رامنځ ته کولو خبرې وکړې
