د ارشاد، حج او اوقافو وزیر د خپل سفر په ترڅ کې د ازبکستان هېواد له ستر مفتي سره وکتل.
یکشنبه ۷ رمضان المبارک ۱۴۴۵ هـ ق (۲۷ حوت ۱۴۰۲ هـ ش)
د ارشاد، حج او اوقافو محترم وزیر شیخ الحدیث سر محقق دکتور مولوي نور محمد ثاقب او ورسره مل پلاوی پرون ماسپښین ازبکستان ته له رسېدو سره سم ددې هېواد د حکومتي مسؤلینو، د مسلمانانو د ادارې د مشر او په تاشکند کې د افغانستان سفارت د مسؤلینو له لوري تود هرکلی وشو.
ورپسې د افغانستان اسلامي امارت د ارشاد، حج او اوقافو وزیر تر مشرۍ لاندې تللي هئیت د ازبکستان هېواد د مسلمانانو د ادارې مشر مفتي شیخ نورالدین خالق نظر سره وکتل.
په دې کتنه کې دواړو لوریو د اړیکو د پیاوړتیا او پراختیا او د نږدې همکارۍ سر بیره د دواړو هېوادونو (افغانستان او ازبکستان) د علماوو ترمنځ د اړیکو پر همغږۍ، د جوماتونو او مدرسو او د دیني زده کړو په برخه کې د تجربو پر تبادلې خبرې اترې وکړې.
د يادونې وړ ده چې دغه هیئت به د خپل سفر په ترڅ کې د ازبکستان هېواد د مسؤلینو سره د لیدنو سربیره د سمرقند او بخارا له اسلامي مرکزونو څخه هم ليدنه وکړي.
