د ارشاد، حج او اوقافو وزیر په کابل کې د سعودي عربستان له سفیر سره وکتل
۲۷ رجب المرجب ۱۴۴۶ هـ ق (۹ دلو ۱۴۰۳ هـ ش)
د افغانستان اسلامي امارت د ارشاد، حج او اوقافو وزیر شیخ الحدیث سرمحقق دکتور نور محمد ثاقب نن له غرمې مخکې د خپل کار په دفتر کې د سعودي عربستان هېواد له سفیر ښاغلي فیصل بن طلق البقمي سره وکتل، په دې کتنه کې د دواړو اسلامي هېوادونو ترمنځ په بېلابیلو برخو کې د اړیکو په پیاوړتیا او د راتلونکي ۱۴۴۶ هـ ق کال د حج پروسې د اسانتیاوو په موخه هر اړخیزې خبرې وشوې.
په پیل کې د ارشاد، حج او اوقافو وزیر، ښاغلي فیصل بن طلق البقمي ته د ښه راغلاست ویلو تر څنګ په کابل کې د ده د نوې ماموریت (ډیپلوماسۍ) د پېل په چارو کې د بریالیتوب هیله څرګنده کړه او د دواړو هېوادونو ترمنځ یې د ژورو اسلامي او تاریخي اړیکو پر مخېنه، د اسلامي هېوادونو په یووالي، او له اسلامي امارت سره د اړیکو د لا پراخیتا په برخه کې مفصلې خبرې وکړې.
ښاغلي ثاقب همداراز وويل، سعودي عربستان د اسلامي نړۍ د یووالي او د مسلمانانو د راټولیدلو مهم ادرس دی او د نورو اسلامي هېوادونو تر څنګ یې له افغانستان سره په مختلفو برخو کې مرسته او همکاري کړې ده، په ځانګړي ډول د حج او عمرې په برخه کې هغه اسانتیاوې چې دوی یی د حاجیانو او معتمرینو لپاره برابروي د ستاینې وړ وبللي او غوښتنه یې وکړه چې په راتلونکي کې د افغانستان لپاره د حاجیانو سهمیه زیاته کړي، د عمرې په چارو کې لا نورې اسانتیاوې رامنځته کړي او په سعودي عربستان کې د افغانستان هغه اوقافي ځمکې چې د حرم شریف په پراخوالي کې داخلي شوې دي په عوض کې حرم شریف ته نږدې بدیل ځمکه یا ودانۍ راکړي.
ورپسي ښاغلي فیصل بن طلق البقمي د ارشاد،حج او اوقافو وزیر د غوښتنو او وړاندیزونو د عملي کولو په برخه کې د همکارۍ ډاډ ورکړ او د خپلو خبرو په دوام یې د اسلامي امارت په کړنو او لاسته راوړنو خوښي وښوده، او زیاته یې کړه چې موږ د افغانستان له اسلامي امارت سره ښې او مثبتې اړیکې غواړو او په راتلونکي کې به د دغو اړیکو د پیاوړیتا لپاره په ګډه کار وکړو او همداراز یې د حج پروسې په وروستیو کلونو کې د ارشاد، حج او اوقافو وزارت لخوا په سعودي عربستان کې د افغان حاجیانو د ښه مدیریت او هلته د حج په چارو کې له ښکیلو ادارو سره د ښې همغږۍ ستاینه وکړه .
