له مکې مکرمې څخه مدینې منورې ته د افغان حاجیانو د انتقال بهیر پیل شو
١٩ ذوالحجة الحرام ۱۴۴۶ هـ ق مطابق ٢٥ جوزا ۱۴۰۴ هـ ش
هغه (۱۵) زره افغان حاجیان چې د افغانستان له څلورو پروازی زونونو څخه د جدې هوايي ډګر ته را انتقال شوي ول، د حج مناسکو له اداء کولو وروسته نن رسماً له مکې مکرمې څخه مدینې منورې ته يې د لیږد بهیر پیل شو.
په مکه مکرمه کې د افغان حاجیانو لپاره د ارشاد، حج او اوقافو وزارت له لوري ټول اړین خدمات تر سره شوي وو، چې دوی په ډیرې اسانۍ سره وکولای شول د حج مراسم او مناسک تر سره کړي چې لله الحمد نن له خپلو معلمینو سره یو ځای د افغان حاجیانو لومړی کاروان د مجهزو بسونو له لارې مدینې منورې ته ورسېده
دغه افغان حاجیان چې مدینې منورې ته ورسېدل هلته د تسکین کميټې له لوري نبوي حرم ته نیږدې عمارو (هستوګنځایونو) کې ځای پر ځای شول.
د یادونې وړ ده چې د افغان حاجیانو دغه بهیر به له مکې مکرمې څخه مدینې منورې ته په منظم ډول دوام ولري او هلته به د اته شپو او ورځو په تیریدو سره په مسجد نبوي کې څلوېښت لمونځونه اداء کوي، د رسول الله ﷺ د مبارکې روضې او د نورو سپېڅلو ځایونو زیارت کولو وروسته به په منظم ډول د ټاکل شوي مهال ویش لمخې د مدینې منورې له هوایي ډګر څخه بیرته افغانستان ته انتقالیږی
