ه افغانستان څخه حرمینو شریفیو ته د ۱۴۴۶ هـ ق کال د معتمرینو لومړۍ الوتنه ترسره شوه
![Umra](/sites/default/files/2024-08/whatsapp_image_2024-08-04_at_21.48.58_f89fc3a8.jpg)
۲۹ محرم الحرام ۱۴۴۶ هـ ق (۱۴ اسد ۱۴۰۳ هـ ش)
له هېواد څخه حرمینو شریفیو ته د ۱۴۴۶ هـ ق کال د معتمرینو لومړی کاروان نن د کابل له نړیوال هوايي ډګر څخه د سعودي عربستان په لور روان شو.
په همدې مناسبت نن د ارشاد، حج او اوقافو وزارت له لوري د مرکزي زون د حاجیانو په مجتمع کې غونډه جوړه شوې وه، چې په کې د ارشاد، حج او اوقافو وزارت مرستیالانو، د اسلامي امارت مسؤلینو، د دې وزارت د مرکزي ریاستونو رئیسانو، د سیاحتي شرکتونو استازو او یو شمېر تلونکو معتمرینو گډون کړی وو.
غونډه د قرآن کریم د څو مبارکو آیتونو په تلاوت سره پیل شوه، ورپسې د یاد وزارت د حج، عمرې او زیارتونو عمومي رئیس مولوي عطاء الله خادم د غونډې پیلیزه وینا وکړه، نوموړي په خپلو خبرو کې د عمرې د اداء کولو په طرزالعمل مفصلې خبرې وکړې.
ورپسې بیا ددې وزارت د عرفان او دیني ځایونو د چارو تنظیم مرستیال شیخ عزیزالرحمن منصور وینا وکړه، نوموړي د عمرې د اداء کولو په فضیلت او ارزښت هر اړخیز معلومات وړاندې کړل.
ښاغلي منصور وویل: ټول سیاحتي شرکتونو مکلف دي چې د معتمرینو لپاره دې تجروبه لرونکي معلمین وګماري او په حرمینو شریفینو کې دې ورته غوره خدمتونه وړاندې کړي.
همدا رنګه په غونډه کې د سیاحتي شرکتونو په استازیتوب مولانا محمد صابر سعید او سید نبي الله پاچا خبرې وکړې، دوی وویل: د افغانستان اسلامي امارت او د ارشاد، حج او اوقافو وزارت له مسؤولینو څخه مننه کوو، چې د عمرې اړونده موضوعاتو او د معتمرینو په لېږد او رالېږد کې یې له موږ سره تل همکاري کړي ده او په ټولو سیاحتي شرکتونو باندې غږ کوو، چې افغان معتمرین ضیوف الرحمن دي د دوی خدمت په موږ او تاسو فرض دی.
همدارنګه په غونډې کې د ارشاد، حج او اوقافو وزارت مسلکي مرستیال شیخ الحدیث زرمحمد حقاني د عمرې د ښه تنظیم او مدیریت په تړاو تفصلي خبرې وکړې نوموړي په خپلو خبرو کې د عمرې په مهمو موضوعاتو رڼا واچوله او له سیاحتي شرکتونو څخه یې غوښتنه وکړه، چې د افغان معتمرینو لپاره دې په سعودي عربستان کې د ژوند ټولې اسانتياوې برابرې کړی .
ښاغلي حقاني معتمرینو ته په خطاب کې وویل: په حرمینو شریفینو کې دې ددغې هېواد د طرزالعملونو او پالیسی سره سم خپل د عمرې مناسک اداء کړئ او بېرته په ښه نوم سره دې خپل هېواد ته راستانه شي.
ښاغلي معین صاحب ټولو معتمرینو ته ډاډ ورکړل، چې د ارشاد، حج او اوقافو وزارت تل د عمرې د اداء کولو له پروسې څخه نظارت کوي او په سیاحتي شرکتونه غږ کوي چې د معتمرینو لپاره د هېواد دننه او په سعودي عربستان کې غوره خدمات وړاندې کړي.
نوموړي د خپلو خبرو په پای کې ټولو معتمرینو ته مبارکي وویله او د مبرور او قبول شوې عمرې دعاء یې وکړه.
غونډه د دعائیه په کولو سره پای ته ورسېده او وروسته له دعاء ټول معتمرین د کابل نړیوال هوایي ډګر په لور روان شول.