په مدینه منور کې د افغان حاجیانو لپاره د سکن او په لومړي ځل د تغذیې قراردادونه ترسره شول
په مدینه منوره کې افغان حاجیانو ته د روان ۱۴۴۴هـ ق مطابق ۱۴۰۲ هـ ش کال د حج فریضې په اداء کولو کې د لازمو اسانتیاوو رامنځ ته کولو او هغوی ته د اړینو خدماتو وړاندې کولو په موخه د سکن (هستوګنځي) او په لومړي ځل د تغذیې (خوړو )قراردادونه ترسره شول.
د افغان حاجيانو د هستوګنې عمارې د عالیقدر امیرالمؤمنین – حفظه الله – او د ارشاد، حج او اوقافو د وزیر، محترم شیخ الحدیث دکتور مولوي نورمحمد ثاقب د هدایاتو او سپارښتنو سره سم د نبوي حرم په مرکزي ساحه کې ونیول شوې، چې په ټولو عصري اسانتیاوو سمبال دی او سږ کال به د حج په موسم کې د پخوانیو کلونو په خلاف زموږ ټول حاجیان نبوي حرم ته څېرمه په جوړو شوو عمارو کې اوسیږي.
همدارنګه سږ کال د ارشاد، حج او اوقافو وزارت په نوښت او ابتکار په لومړي ځل په مدینه منوره کې هم د افغان حاجیانو لپاره د اعاشې قرارداد ترسره شو.
یاد قرارداد د افغان حجاجو لپاره هم له مادي او هم له معنوي اړخونو خورا مهم ؤ او په دې سره به افغان حاجيانو ته په ډیر کم لګښت درې وخته خواړه په خپلو ځایونو کې رسیږي او د پخوا په شان به لرې سیمو ته په ډوډۍ پسې د تګ له وجې د دوی ارزښتناک وخت نه ضایع کیږي.
یاد قراردادونه له کابل څخه د اړوندو ارګانونو د ګډ لیږل شوي پلاوي په دوامدارو هلو ځلو د سیمې او د نړۍ د نورو اسلامي هېوادونو په پرتله په کم قیمت ترسره شوي دي
یاد قرار دادونه د ارشاد، حج او اوقافو وزارت د مالي او اداري عمومي رئیس او د لیږل شوي پلاوي د مشر، محترم مولوي عبدالولي حقاني او د (موسم المدینة للنزل السیاحیة) مؤسسې د مشر، محترم محمد قصلي علي الشهري او د (صفوة الوسام لخدمات الإعاشة) شركت د رئیس، محترم محمد فرحان قریشي ترمنځ په مدینه منوره کې د افغان حاجیانو د بعثې په دفتر کې لاسلیک شول.
د یادولو وړ ده چې په مکه مکرمه کې هم د افغان حاجيانو لپاره د هستوګنځي، اعاشې او ترانسپورټ قراردادونه وروستۍ مرحلې ته نږدې شوي او په راتلونکو لنډو ورځو کې به د هېوادوالو له منافعو او مصالحو سره سم له نهايي کېدو سره سم لاسلیک شي
