د ارشاد، حج او اوقافو وزیر د افغانستان لپاره د ملګرو ملتونو د پرمختیایي پروګرامونو له استازي سره خبرې وکړې.
شنبه ٢٥ سلواغې ١٣٩٩
کابل: نن د ارشاد، حج او اوقافو وزیر محمد قاسم حلیمي د افغانستان لپاره د ملګرو ملتونو د پرمختیایي پروګرامونو له استازي ښاغلي عبدالله الدردري سره ولیدل.
په دغه لېدنه کې د وزارت د پالیسۍ او پلان معین انجینر محمد عثمان طارق هم حضور درلود.
په پیل کې د ارشاد، حج او اوقافو وزیر محمد قاسم حلیمي د دې وزارت له لوري د راتلونکو پروګرامونو لکه: دارالافتاء او عامه پوهاوي په برخه کې د اړیکو مرکز جوړولو، په جوماتونو کې د ښوونې او روزني د یو منظم تعلیمي سیستم رامنځته کولو، د زندانیانو لپاره د ښوونیز او روزنیز سیستم رامنځته کولو، د حج پروسې د معلوماتو خوندي کولو سیستم او د اوقافو په برخه کې د یو منظم عایداتي سیستم د رامنځته کولو په اړه خبرې وکړې.
ورپسې د افغانستان لپاره د ملګرو ملتونو د پرمختیایي پروګرامونو استازي ښاغلي عبدالله الدردري د یادو پروګرامونو په اورېدو خوښي وښوده او ژمنه یې وکړه، چې د ملګرو ملتونو پرمختیایي اداره به د نافذه قوانینو په چوکاټ کې خپلو امکاناتو ته په کتو د ارشاد، حج او لوقافو وزارت سره د هر ډول تخنیکي او مادي مرستو په برخه کې همکاري وکړي.
