د کورونا دوهم څپې په اړه مطبوعاتي کنفرانس
چهارشنبه، ۲۶ لیندۍ ۱۳۹۹
حلیمي: د کرونا ویروس خپرېدو مخنیوي لپاره دې، په مسجدونو او کورونو کې د فاتحې مراسمو له جوړولو ډډه وشي
کابل، افغانستان: د عامې روغتیا او ارشاد، حج او اوقافو وزیرانو، په ګډه له خلکو څخه غوښتنه وکړه، چې د کرونا ویروس دویمې څپې خپرېدو مخنیوي لپاره، پر روغتیاي پیغامونه او مشورو عمل وکړي.
د عامې روغتیا وزیر، احمد جواد عثماني، چې د جمهوري ریاست د عامه او ستراتېژیکو اړیکو ادارې- د حکومت د اطلاعاتو او رسنیو په مرکز کې یې د ارشاد، حج او اوقافو له وزیر سره په یوه ګډ خبري کنفرانس کې ګډون کړی وو؛ دې ته په اشارې چې افغانستان عملاً له ۹ اونیو راپدېخوا د کرونا ویروس دویمې څپې خپرېدو ته داخل شوی، له خلکو غوښتنه وکړه چې د ماسک په کارولو سره، په ټولنه کې د یاد ویروس د حرکت مخه محدوده کړي.
دغه راز نوموړي په مکرر ډول په اوبو او صابون د لاسونو مېنځل او د ګڼېګوڼې ځایونو ته د خلکو نه تګ، د کرونا ویروس د خپرېدو محدودولو کې مهم او اغېزناک وبلل.
همدارنگه په دې خبري کنفرانس کې د ارشاد، حج او اوقافو وزیر، محمد قاسم حلیمي هم له خلکو څخه وغوښتل چې د عامې روغتیا وزارت پر سپارښتنو چې د ماسک کارول، په اوبو او صابون سره د لاسونو مېنځل او د ګڼېګوڼې ځایونو ته نه تلل دي، عمل وکړي او د جماعت په لمانځه کې هم اړین واټن په پام کې ونیسي.
دغه راز حلیمي د کرونا ویروس خپرېدو مخنیوي په موخه، له هېوادوالو څخه غوښتنه وکړه چې په جوماتونو او کورونو کې د فاتحې مراسمو له جوړولو ډډه وکړي او وې ویل چې په دې برخه کې به اړینې لارښوونې هم تر سره شي.
د عامې روغتیا وزیر په ډاګه کړه چې د کرونا ویروس د دویمې څپې مدیریت په موخه، د افغانستان د اسلامي جمهوریت د رهبرۍ او جمهور رییس د پاملرنۍ له امله په مرکز او ولایتونو کې اړینه همغږي رامنځته شوې او په ورځني ډول د عامې روغتیا له رییسانو او ولایتي روغتونونو سره، د عامې روغتیا وزارت تماسونه ټینګ شوي او کاري کمېټو هم په دې برخه کې فعالیت پیل کړی دی.
هغه وویل: د کرونا لومړۍ څپې پر مهال په مرکز او ولایتونو کې د کووېډ۱۹ ناروغانو اړوند روغتونونو کې د بسترونو ټولیز شمېر ۹۶۶ ته رسېده، خو اوسمهال دغه شمېر ۲۰۷۱ ته لوړ شوی دی.
د عامې روغتیا وزیر وویل د کرونا ویروس لومړنۍ محموله به، چې د واکسین او خوندي کولو د نړیوال ائتلاف (Gavi) لخوا د هېواد ۲۰ سلنه وګړو ته ځانګړی شوی او د واکسین تر لاسه کوونکو کټګورۍ هم تعیین شوي دي، تر راتلونکو اوه میاشتو پورې هېواد ته راورسېږي.
عثماني زیاته کړه چې نړیوال بانک له افغانستان سره د کرونا ویروس برابرولو په موخه، ۱۰۰ میلیون ډالره او د اسیا پراختیایي بانک ۵۰ میلیون ډالره ژمنه کړې او دغه راز د دولت د رهبرۍ په کچه هم په زیاته اندازه د واکسین د تدارک لپاره، هڅې روانې دي.
