د ارشاد، حج او اوقافو وزارت له آریانا افغان او کام ایر هوايي شرکتونو سره د ۱۴۴۶هـ ق کال د حاجیانو د لېږد او رالېږد تړون لاسلیک کړ

یکشنبه ۱۰شعبان المعظم ۱۴۴۶هـ ق( ۲۱ دلو کال ۱۴۰۳هـ ش )

د ارشاد، حج او اوقافو وزیر شیخ الحدیث سرمحقق دکتور نورمحمد ثاقب نن د خپل کار په دفتر کې له آریانا افغان او کام ایر هوایي شرکتونو له مسؤلینوسره د ۱۴۴۶هـ ق کال سعودي عربستان ته د دیرش (۳۰) زره حاجیانو د لیږد او رالیږد تړون لاسلیک کړ.

دغه غونډه چې د ارشاد،حج او اوقافو وزیر تر مشرۍ لاندې جوړه شوې وه، پکې د دې وزرات د مقام مرستیال، مرکزی ریاستونو رئیسانو او علماوو د آریانا افغان هوایي شرکت رئیس مولوي عبدالولي صدیقي، د کام ایر هوایي شرکت مرستیال حاجي آتیلا کامګار او د یادو شرکتونو تخنیکي او مسلکي کارمندانو ګډون کړی وو.

په یاده غونډه کې د ارشاد، حج او اوقافو وزیر وویل: الحمدلله سږکال هم د تېرو کلونو په څیر د حج دیني او ملي پروسه د الله ﷻ په فضل او نصرت سره په ښه توګه پرمخ روانه ده.

نوموړي زیاته کړه، دواړه داخلي هوايي شرکتونه غواړي په دیني او ملي جذبې سره د حج دغه ملي پروسه مخته یوسي ، ترڅو په دغه ستره دیني او ملي پروسه کې خپل مسؤلیت په ښه ډول ترسره کړي.

همداشان د راشاد، حج او اوقافو وزیر وویل:د افغانستان اسلامي امارت هوډ لري چې افغانستان په مختلفو برخو کې په ځان بسیا کړي،لکه څنګه چې د حج په دغه ملي پروسه کې د حاجیانو لیږد او رالیږد زموږ داخلي شرکتونه ترسره کوي، په نورو بیلابیلو برخو کې هم  هڅه کوو چې د ځان بسیاینې په لور ګامونه واخلو او هیله لرو، چې د نورو کلونو په څیر سږ کال هم حاجیان د منظم سکیجول له مخې سعودي عربستان ته  انتقال  او بیرته راستانه کړل شي.

ورپسې د اریانا افغان او کام ایر هوایي  شرکتونو  مسؤلینو د ارشاد،حج او اوقافو وزارت له هلو ځلو او منظمو پروګرامونو څخه ستاینه وکړه او له خپل لوري یې د هر ډول ښه خدمت وړاندې کولو ژمنه وکړه او ویې ویل هیله لرو چې خپلو ټولو امکاناتو او شته ظرفیتونو ته په کتو حاجیانو ته هر ډول اسانتیاوې برابرې کړو او زياته يې کړه: هڅه به وکړو چې له وزارت سره په همغږۍ د هیواد د ننه او بهر د حاجیانو د لیږد او را لیږد پروسه په ښه ډول مدیریت کړو او دواړه شرکتونه به د هېواد له څلورو پروازي زونونو او په سعودي عربستان کې په دواړو  هوایي ډګرونو ( مدینه منوره او جده) کې حاجیانو ته ښه خدمتونه وړاندې کړو.

دوی وویل: د حاجيانو لېږد او رالیږدتجارت او سوداګري نه ، بلکې خپله ديني او ملي وجيبه ګڼو او په بشپړ  توګه تخنیکي او عملیاتي چمتووالی  ورته لرو.

غونډه په دعائیې سره  پای ته ورسيده.