د ارشاد، حج او اوقافو وزارت له لوري د کابل ښار د ټولو (۲۲) ناحیو په کچه د قرآن کریم د حفظ مع التجوید د دیارلسمې او حُسنِ قرائت د لومړۍ دورو سیالۍ پیل شوې
چهارشنبه، ۱۰/ رجب المرجب/ ۱۴۴۷هـ ق، مطابق ۱۰/جدي/ ۱۴۰۴هـ ش
د ارشاد، حج او اوقافو وزارت له لوري د کابل ښار د ټولو (۲۲) ناحیو په کچه د قرآن کریم د حفظ مع التجوید د دیارلسمې دورې او د حُسنِ قرائت د لومړۍ دورې سیالۍ د مرکزي زون د حاجیانو په مجتمع کې، د یاد وزارت د مسلکي مرستیال محترم مولوي محمد حامد حسیب، د مرکزي ریاستونو یو شمېر رئیسانو، داورانو او قاري صاحبانو په حضور کې په رسمي ډول پیل شوې، یادې سیالۍ د هېواد د ممتازو حافظانو او قاریانو د تشخیص او نړیوالو سیالیو ته یې د ورپېژندلو په موخه ترسره کېږي.
په همدې تړاو جوړه شوې غونډه کې د ارشاد، حج او اوقافو وزارت مسلکي مرستیال وینا وکړه او ویې ویل: د شُکر ځای دی چې په داسې یوه غونډه کې ګډون کوو، چې ګډونوال یې ټول د قرآن عظیم الشأن حافظان دي. قرآن کریم د رسول الله صلي الله علیه وسلم یوه ستره معجزه ده او دا الهي معجزه به د قیامت تر ورځې پورې پاتې وي.
ښاغلي حسیب همداراز وویل: قرآن کریم د الله تعالی له لوري د ټولو انسانانو لپاره د لارښود کتاب په توګه رانازل شوی دی او تر قیامته پورې چې هر څومره انسانان نړۍ ته راځي د هغوی لپاره به د هدایت سرچینه وي.
محترم معین صاحب همدارنګه د هېواد د ممتازو حافظانو او قاریانو ستاینه وکړه او په نړیوالو سیالیو کې یې د هغوی د موفقیت او کامیابۍ هیلې څرګندې کړې.
د یادونې وړ ده چې د قرآن کریم د حفظ معالتجوید د سیالیو دیارلسم پړاو او د حُسنِ قرائت د سیالیو لومړی پړاو، تر دې وړاندې د ارشاد، حج او اوقافو وزارت له لوري د هېواد په ټولو ولایتونو کې د ممتازو حافظانو او قاریانو د پېژندنې او نړیوالو سیالیو ته د هغوی معرفي کولو په موخه ترسره شوې وې چې د دغو سیالیو په پایله کې له هرې برخې څخه یو ـ یو تن ممتاز حافظ او قاري د هېواد له (۳۴) ولایتونو څخه په وروستي پړاو سیالیو کې د ګډون لپاره مرکز ته معرفي شوي دي.
