د ارشاد، حج او اوقافو وزیر د الکترونیکي مسار کمېټې (د حاجیانو ویزې د چاپ سیسټم) له کاري بهیر څخه لیدنه وکړه.
جمعه ۲۴ شوال المکرم ۱۴۴۵ هـ ق (۱۴ ثوز ۱۴۰۳ هـ ش)
د ارشاد، حج او اوقافو محترم وزیر شیخ الحدیث سرمحقق قضاوتپوه دکتور مفتي نور محمد ثاقب د الکترونیکي مسار کمېټې له کاري جریان څخه لیدنه وکړه، په دغه کمېټه کې د حاجیانو پاسپورټونه سیسټم ته داخلېږي او د حاجیانو ویزه چاپ کېږي، همدا راز د حاجیانو دتنظیم گروپ بندی، په مدینه منوره او مکه مکرمه کې د حاجیانو د ځایونو ټاکل او همداشان نور مهم معلومات د همدې سیستم له لارې تنظیمیږي.
د ارشاد، حج او اوقافو وزیر د حاجیانو ویزو د پرینټ له بهیر څخه د لیدنې پرمهال وویل: الحمدلله سږ کال د حج پروسه د پخوانیو پلانونو او له اړوندو خواوو سره د لا زياتې همغږۍ او د وزارت د مسؤولينو او کارکوونکو په هلو ځلو د تيرو کلونو په پرتله ډير ښه تنظيم او ترتيب شوي دي.
نوموړي زیاته کړه چې ان شاء الله د افغانستان حاجیان به په ټاکلي وخت د بیت الله شریف د حج اداء کولو لپاره سعودي عربستان ته ولیږل شي او هلته مو هم د هغوی لپاره لازمې اسانتیاوې برابرې کړي دي.
د یادونې وړ ده چې په نیږدې راتلونکي کې به له افغانستان څخه سعودي عربستان ته د آریانا افغان او کام ایر هوایي شرکتونو له لوري د حاجیانو پروازونه پیل شي.
