د ارشاد، حج او اوقافو وزارت له لوري د ۱۴۴۶ هـ ق کال د حج بعثې اعضاوو او مسؤولینو لپاره جوړ شوی ښوونیز او روزنیز سیمینار په بریالیتوب سره پای ته ورسېد
۲۸ شوال المکرم ۱۴۴۶ هـ ق مطابق ۶ ثور ۱۴۰۴ هـ ش
د ارشاد، حج او اوقافو وزارت له لوري د ۱۴۴۶ هـ ق مطابق د ۱۴۰۴ هـ ش کال د حج بعثې د غړو لپاره درې ورځنی ښوونیز او روزنیز سیمینار چې ددې وزارت د محترم وزیر شیخ الحدیث سرمحقق دکتور نورمحمد ثاقب په مستقیمه لارښوونه او څارنه په پلازمینه کابل کې پیل شوی ؤ په بریالیتوب سره پای ته ورسېد.
په یاد ښوونیز او روزنیز سیمینار کې د افغانستان د حج بعثې غړو او مسؤلینو د خپلو دندو او اداري مکلفیتونو په اړه ژور پوهاوی او عملي مهارتونه ترلاسه کړل، همداراز د سیمینار له لارې هڅه وشوه چې د بعثې د بېلابېلو برخو او کمېټو ترمنځ همغږي لا پیاوړې شي، دحج چارو د ښه تنظیم لپاره یو واحد تګلوری رامنځته شي او د بعثې ټول غړي له هغو اصولو، کړنلارو او مقرراتو سره په بشپړه توګه آشنا شي چې د حاجیانو د خدمت لپاره اړین ګڼل کېږي.
د سیمینار په وروستۍ ورځ د ارشاد، حج او اوقافو وزارت مسلکي مرستیال شیخ الحدیث مولوي زرمحمد حقاني، د مرکز او ولایاتو یو شمېر رئیسانو، د سیمینار استاذانو او د افغانستان د حج بعثې ټولو اعضاوو ګډون درلود.
د وزارت مسلکي مرسیتال د سیمینار ګډونوالو ته ګټوره وینا وکړه او د حاجیانو خدمت یې ستر مسؤلیت او د لوی اجر او ثواب سبب یاد کړ، نوموړي ټینګار وکړ چې د حاجیانو د حدمت ترڅنګ حرمینو شریفینو د آدابو رعایت باید په درناوي، عاجزۍ او بشپړ اخلاص سره ترسره شي او همداراز باید ټولې کمېټې خپلو دندو ته جدي پاملرنه وکړي او د سعودي عربستان د حکومت له لوري وضع شوي مقرارات په پام کې ونیول شي.
د یادونې وړ ده چې په دغه درې ورځني سیمینار کې د حج بعثې ټولو اعضاوو ته د ارشادي او دیني موضوعاتو ترڅنګ د بېلابېلو کاري کمېټو لکه ټرانسپورټ، تغذیه، روغتیا، تسکین، ترحیل، مفقودینو، بهرنیو اړیکو، فرهنګي او نشـراتي او هوایي ډګرونو کمېټو اړوند تفصیلي او هراړخیز معلومات ورکړل شول، تر څو هغوی وکولای شي خپلې دندې په ښه توګه وپیژني، خپلمنځي همغږي وساتي او حاجیانو ته غوره، منظم او پر وخت خدمتونه وړاندې کړي.
