ارشاد، حج او اوقافو وزیر د ۱۴۴۴ هجري قمري کال د حج بهیر د څارنې او ارزونې او د اسلامي هېوادونو د حج او اوقافو وزیرانو په کنفرانس کې د ګډون لپاره حرمینو شریفینو ته ولاړ
۲۸ ذوالقعده ۱۴۴۴ هـ ق (۲۷ جوزا ۱۴۰۲ هـ ش)
د ارشاد، حج او اوقافو وزیر محترم شیخ الحدیث دکتور مولوي نور محمد ثاقب تیره شپه د روان کال د حج له بهیر څخه د څارنې او ارزونې په موخه او د اسلامي هېوادونو د حج او اوقافو د وزيرانو په هغه ستر کنفرانس کې چې د سعودي عربستان په جده ښار کې جوړیږي ګډون لپاره یاد هیواد ته ولاړل شو.
د نوموړي الوتکه د جدې په هوايي ډګر کې د ښکته کېدو وروسته، د سعودي عربستان د مسؤولینو او د مکې مکرمې د حج بعثې د غړو لخوا يې تود هرکلى وشو.
محترم شیخ الحدیث دکتور نور محمد ثاقب د یوې لنډې دمی په ترڅ کې زمونږ له خبریال سره په مرکه کې وویل: د دوی د سفر هدف د مدینې منورې او مکې مکرمې د حج بعثو د کاري کمېټو د ورځې او شپې د فعالیتونو څخه څارنه او نظارت ده او زموږ د ګران هېواد حاجیانو ته د حج فریضې د اداء کولو لپاره د اسانتیاوو رامنځته کول دي.
ښاغلي ثاقب په خپلو څرګندونو کې زیاته کړه: لکه څنګه چې د حج ورځې په رارسېدو دي او زموږ د اسلامي هېواد اکثريت حاجيان په منظم او هر اړخيز برنامو ترڅنګ په پروازي زونونو کې تر ډیره کچه بشپړ شوي دي او د الوتنو د دقیق مهال ویش سره سم حرمینو شریفینو ته داخل شوي دي. نو اړينه ده چې په خپلو کاري څانګو کې د ټولو مسؤولینو په ګډون سره د یوه منظم پلان له مخې افغان حاجیانو ته خدمت وکړو.
ښاغلي ثاقب په داسې حال کې مکې مکرمې ته ورسېد چې د حج بعثې د مسؤولینو لخوا یې ملتیا کېده.
د مکې معظمې د حج بعثې د مسؤولینو په وینا، محترم ثاقب صاحب به د سعودي عربستان د رسمي بلنې له مخې د سه شنبې په ورځ د ذوالحجې په ۲ مه نېټه د حج او اوقافو وزیرانو او د اسلامي نړۍ د مشهورو شخصیتونو په هغه ستر کنفرانس کې چې د سعودي عربستان د جدې ښار کې جوړېږي، ګډون وکړي.
