د ارشاد، حج او اوقافو وزات له لوري د حاجیانو معلمینو لپاره په کندهار ولایت کې په لار اچول شوې روزنیز سیمینار دوام لري
د ارشاد، حج او اوقافو وزارت له لوري د حاجیانو د معلمینو لپاره پیل شوی سیمینار چې د افغانستان اسلامي امارت د امیرالمؤمنین شیخ القرآن والحدیث مولوي هبة الله اخندزاده حفظه الله د حکم پر بنسټ په کندهار ولایت کې پیل شوی، لا هم په پوره نظم، لوړ مسلکي معیاراو علمي فضاء کې جریان لري.
په یاد سیمینار کې ګډونوالو معلمینو ته د حج مناسکو، د حاجیانو د سمې ر هبرۍ، اداري همغږۍ، او د حج د مختلفو پړاوونو اړوند مهم او تخصصي درسونه وړاندې کیږي.
د ارشاد، حج او اوقافو وزیر شیخ الحدیث سرمحقق دکتور نور محمد ثاقب لا هم په کندهار ولایت کې تشریف لري او د یاد سیمینار له نږدې څارنه او نظارت کوي.
نوموړی په ورځني ډول د سیمینار بهیر ارزوي، او هغه لازمې او ضروروي سپارښتنې چې د حج په پروسه کې د معلیمنو لپاره ضروروي دی د هغوی په عملي کولو او زده کولو ټینګار کوي او د دې پروسې د ښه نظم او مدیریت په خاطر د شیوخو کرامو، مسلکي استاذانو وړاندیزونه اوري.
د ارشاد، حج او اوقافو وزیر وویل، چې په یاد سیمینار کې د هېواد په کچه د لویو شیوخو کرامو، جیدو علماوو، او مسلکي استاذانو لخوا په مختلفو برخو کې د حاجیانو معلمینو ته د حج په ارشادي ،مسلکي او نور اړوندو برخو کې مهم او ارزښتناک معلومات وړاندې کیږي.
نوموړي په خپلو خبرو کې وویل، حج نه یوازې یو فریضه ده، بلکې یو تاریخي، توحیدي او ټولنیز پیغام هم لري دا د حضرت ابراهیم علیهالسلام د خلوص، اطاعت او قربانۍ تسلسل دی چې تر قیامته پورې به ژوندی وي.
ښاغلي ثاقب په خپلو خبرو کې وویل، حج د صبر، زغم، ایثار او فداکارۍ عبادت دی، حاجي باید د دې مبارک سفر پر مهال نه یوازې فزیکي کړاونه وزغمي، بلکې خپل نفس، خواهشات او نفساني غوښتنې هم کنټرول کړي، دا هغه وخت دی چې انسان د الله جل جلاله د قرب حاصلولو لپاره خپل ټول مادي او شخصي غوښتنې تر شا پرېږدي.
نوموړي له معلمینو وغوښتل چې حاجیان د دې روحیې پر درک پوه کړي، څو هغوی وکولای شي د حج له حقیقي روح او پیغام څخه بشپړه ګټه واخلي.
د یادونې وړه چې په یاد سیمینار کې (۶۵۲) معلمین ګډون لری او دوی دا روزنیز سیمینار ډېر ګټور او بېساری بولي، او وایي دا روزنه به هغوی ته دا زمینه برابره کړي چې د حاجیانو لپاره یو همغږی، منظم او اغېزناک خدمت ترسره کړي
