د ارشاد، حج او اوقافو وزیر د ترکیې په استانبول ښار کې د مسلمانو علماوو د نړیوالې ټولنې له مشر سره وکتل

سه شنبه ۷ ذوالقعدة الحرام ۱۴۴۵ هـ ق (۲۶ ثور۱۴۰۳ هـ ش)

د ارشاد، حج او اوقافو وزیر ښاغلی شیخ الحدیث سرمحقق قضاوتپوه دکتور مفتي نور محمد ثاقب د اسلامي نړۍ د علماوو د مشورتي کنفرانس له پای ورورسته د ترکیې په استانبول ښار کې د مسلمانو علماوو د نړیوالې ټولنې مشر دکتور شیخ علي محی الدین القره داغي سره وکتل.

په پیل د ارشاد، حج او اوقافو وزیر خبرې وکړې او د یادې اتحادیې له رئیس څخه یې په دې وروستیو کې افغانستان ته د راغلي پلاوي د لېږلو له امله مننه وکړه او د افغانستان له اسلامي امارت سره يې د دې اتحاديې د لا زياتو اړيکو غوښتنه وکړه، نوموړي دغه راز په علمي او ښوونیزو برخو کې د ترسره شویو کارونو له امله قدرداني وکړه.

ورپسې دکتور شیخ علي القره داغي خبرې وکړې او لومړی یې د اسلامي نړۍ د علماوو په مشورتي کنفرانس کې د شیخ الحدیث سر محقق قضاوتپوه دکتور مفتي نور محمد ثاقب په شتون او راتگ سره خوښي څرګنده کړه او د دې اتحادیې د فعالیتونو په اړه یې د ارشاد، حج او اوقافو وزیر ته معلومات وړاندې کړل، ښاغلي داغي وویل: دغه اتحادیه د نړۍ د علماوو یوه لویه ډله لري او د نړۍ په څه باندې (۹۰) هېوادونو کې فعالیت او نمایندگي لري همدارنګه نوموړي خوښي څرگنده کړه، چې د افغانستان اسلامي امارت په رأس کې علماء کرام شتون لري نوموړي د دیني او مدني برخو ستاینه وکړه او له اسلامي امارت سره یې د دغې اتحادیې د اړیکو د ټینگښت په موخه د لا زیاتو همکاریو ژمنه وکړه.

په دې کتنه کې دواړو لورو په بېلابېلو موضوعاتو خبرې وکړې او د ارشاد، حج او اوقافو وزارت او د علماوو د اتحاديې ترمنځ يې د ديني او علمي همکاريو پر پياوړتيا ټينګار وکړ او راتلونکي کې په د دې اتحاديې کې د افغان علماوو رول مثبت او اغېزناک وباله.

یاده غونډه د ارشاد، حج او اوقافو د وزیر او د نړۍ د مسلمانانو د اتحادیې مشر تر منځ تر سره شوه او په پای کې شیخ القره داغي او شیخ الحدیث نور محمد ثاقب یو بل ته د ډالۍ په توګه خپل علمي اثار ورکړل.

دغه غونډه د دوستۍ او صمیمیت په فضا کې پای ته ورسېده.