د ارشاد، حج او اوقافو وزیر په داسې حال کې چې دکابل ښاروال یې ملتیا کوله له بنې حصار څخه تر بگرامیو ولسوالۍ پوري دجوړیدونکې سرک د کار له بهیر څخه لیدنه وکړه .
یکشنبه ۱۰ ربیع الثاني ۱۴۴۶ هـ ق (۲۲ میزان ۱۴۰۳ هـ ش)
د افغانستان اسلامي امارت د ارشاد، حج او اوقافو وزیر شیخ الحدیث سرمحقق قضاوتپوه دکتور مفتي نور محمد ثاقب او د کابل ښاروال محترم مولوي عبدالرشید د هغه نښلوونکي سرک له کاري بهیر څخه لیدنه وکړه، چې د اتمې ناحیې اړوند بیني حصار سیمې څخه پیل، ګلبټې، قلعه بلوچ، قلعه حسن خان، شیخانو او دولت زیو له سیموڅخه تیریږي او تر بگرامیو ولسوالۍ پورې رسېږي.
یاد سرک چې د ارشاد، حج او اوقافو وزیر په هلو ځلو، د ریاست الوزرا په ځانګړې پاملرنې او د کابل ښاروالۍ له لوري یې رغنیزې چارې څه وخت وړاندی پیل شوې وې، د جوړولو چارې یې په ښه کیفیت او چټکتیا سره روانې دي، دغه سرک چې (٧۵۰۰) متره اوږدوالۍ او(۸) متره سور لري، د کابل ښاروالۍ د ښاري زیربناوو ریاست د ډیزاین له مخې په اساسي او کانګریټې ډول جوړیږي چې د لښتیو، پیاده روونو، پلچګونو او د یوه معیاري سرک د نورو برخو په ګډون ټولې اسانتیاوي په نظر کې نیول شوي دې او تمه ده چې د ژمي تر را رسېدو مخکې ګټې اخیستنې ته وسپارل شي.
د دې کتنې پر مهال د ارشاد، حج او اوقافو وزیر وویل: "د اسلامي امارت په بیا واکمنېدو سره هڅه شوې چې په هېواد کې د متوازن پرمختګ لپاره زمینه برابره شي، او هغو پروژو ته ځانګړې پاملرنه شوې چې د هېواد اقتصادي وده پیاوړي کوي.
نوموړي زیاته کړه: "اسلامي امارت د هېواد بیا رغونې او آبادۍ ته ژمن دی او په ورته وخت کې یې د ملت د عقایدو، اخلاقو او عنعناتو ساتلو کې هم خپل مسؤلیت په ښه توګه سرته رسولی دی."
د ارشاد، حج او اوقافو وزیر د کابل ښاروالۍ کړنې وستایلې او هیله یې څرګنده کړه چې ورته نورې رغنیزې پروژې به هم په بریالیتوب سره پلي شي.
په ورته مهال د کابل ښاروال محترم مولوي عبدالرشید هم خبرې وکړې هغه وویل: کابل ښار کې بېلابېلې رغنېزې پروژې روانې دي، چې له هغو مهمو پروژو څخه یې یوه د دغه سرک د جوړولو پروژه ده، نوموړي وویل، چې د یاد سرک په جوړېدو سره به له یوې خوا په اړونده سیمو کې ترافیکي ستونزې حل شي او له بلی خوا به د سیمې په معیاري وده کې ډېر اغیزمن واقع شي .
نوموړي د دغه سرک د جوړېدو په چارو کې د ارشاد، حج او اوقافو وزیر هڅې وستایلې او له هغه څخه یې مننه وکړه.
همدا راز د یاد سرک تر لیدنې وروسته دواړو مشرانو د دولت زیو په کلي کې دارشاد، حج او اوقافو وزارت تر څارنې لاندې جوړیدونکې جومات (مسجد النور) د ودانیزو چارو څخه هم لیدنه وکړه نوموړو مشرانو ددغه جومات د کارونو له چټکتیا او کیفیت څخه خوښي څرگنده کړه.
د یادونې وړ ده چې په نیږدې راتلونکي کې به د یاد جومات دجوړیدو چاري بشپړی او د لمونځ کوونکو پرمخ پرانیستل شي.
