د ارشاد حج او اوقافو وزارت د بیرغ ملي ورځ ولمانځله
نن سه شنبه د ۱۳۹۹لمریز کال زمري په ۷نیټه د ارشاد حج او اوقافو وزارت د غونډو په تالار کې په دغه مناسبت غونډه کې د وزارت مسلکي معین ډاکټر امین الدین مظفري، د وزارت سلاکارانو، رئیسانو او ګڼو نورو منسوبینو برخه اخیستې وه.
د قرانکریم مبارکو آیتونو له تلاوت وروسته چې د شیخ القرا برکت الله سلیم په واسطه ولوستل شول، ډاکټر امین الدین مظفري د یاد وزارت مسلکي معین د بیرغ او د بیرغ د ملي ورځې په اړه خبرې وکړې.
ښاغلي مظفري په پیل کې د بیرغ ملي ورځې په مناسبت ټولو هیواد والو ته مبارکي وویله نوموړي په خپلو خبرو کې زیاته کړه«بیرغ د یو هېواد، ولس او قوم د اقتدار، خپلواکۍ او هویت نښه ده؛ زموږ بیرغ له نورو څخه متفاوت دی، د ملي بیرغ پرځمکه د محراب، ممبر او کلمې نښان زموږ د دیانت او ایماندارۍ ښکارندوي کوي او د الله اکبر شتون زموږ د مبارزو نښه ده»
تر غونډې وروسته د وزارت په انګړ کې ملي بیرغ د مسلکي معین ښاغلي امین الدین مظفري له خوا د نورو منسوبینو په ملتیا په رپا راوستل شو.
