منی شریف ته د افغانستان (۳۰) زره حاجیان د یوم الترویه په ورځ ورسیدل
۸ ذوالحجة ۱۴۴۴ هـ ق ( ۵ د سرطان ۱۴۰۲ هـ ش) نن د حج لومړۍ ورځ چې د یوم الترویه ورځ بلل کیږي، د اسلامي نړۍ له بېلابېلو هېوادونو څخه، څه د پاسه دوه میلیونو حاجیانو په ګډون د افغانستان ۳۰ زره حاجیان د حج د فريضې د اداء کولو په موخه منی ته ورسیدل. د ارشاد، حج او اوقافو وزير او د افغانستان د حج د بعثې عمومي رئيس شيخ الحديث دکتور مولوي نورمحمد ثاقب له مکې مکرمې څخه منی شریف ته د ټولو افغان حاجيانو د تګ خبر ورکړ او وې ويل: چې نن د ذوالحجې اتمه ورځ ده او حجاج کرام په منی کې په خپلو خیمو کې په عبادت بوخت دي. او سبا د ذوالحجې نهمه ورځ به لخیره حاجیان عرفات ته انتقالیږی او هلته به هم په خپل عبادت سره ورځ تېروي. هغه زیاته کړه: په حج کې مشکلات او سختۍ شته؛ خو دا سختۍ د الله تعالی په لار کې دي او حاجیان باید په دې لاره کې له صبر او حوصیلې څخه کار واخلي د یاونې وړ ده چې منی شریف د مکې مکرمې له ښار څخه په پنځه کیلو مترۍ کې موقعیت لري، چیرې چې د حج د مناسکو د آمادګۍ لپاره لومړی د ټولو اسلامي هیوادونو حاجیان هلته راټولیږي.