د ارشاد، حج او اوقافو وزارت نوی مسلکي مرستیال معرفي شو
سه شنبه ۱۱/جمادی الآخرة/۱۴۴۷هـ ق، مطابق ۱۱/قوس/۱۴۰۴هـ ش
د ارشاد، حج او اوقافو وزارت نوی مسلکي مرستیال، محترم مولوي محمد حامد حسیب، نن سه شنبه د یوې ځانګړې غونډې په ترڅ کې، چې د چارو ادارې لوی ریاست مرستیال، د وزارت مسؤولینو او یو شمېر رئیسانو او کارکوونکو پکې ګدون کړی وو، معرفي شو.
په یاده غونډه کې د وزارت مالي او اداري مرستیال، محترم مولوي عارف الله عارف، نوي مسلکي مرستیال او میلمنو ته د ښه راغلاست ویلو ترڅنګ هیله څرګنده کړه، چې د محترم مسلکي معین صاحب په راتګ سره به د وزارت په چارو کې لاښه والی او مؤثریت رامنځته شي.
ښاغلي معین صاحب په خپلو خبرو کې وویل، چې د ارشاد، حج او اوقافو وزارت د اسلامي امارت په تشکیلاتي جوړښت کې یو له مهمو وزارتونو څخه دی، ځکه چې دغه وزارت په هېواد کې د جوماتونو د منابرو، د جُمعې د خُطبو، د قاریانو د روزنې، د دیني تعلیماتو د تنظیم، د امامانو د تدریب، د اسلامي علومو د تدقیق او مطالعاتو، د حج او عمرې له لارې د دین د نفاذ او د ملت د سالم تربیت په موخه مهم او پراخ خدمات ترسره کوي او دا هغه څه دي چې اسلامي نظام یې غوښتنه کوي.
هغه همدارنګه زیاته کړه چې یادې چارې د وزارت د مسلکي معینیت له اساسي دندو څخه دي او دغه معینیت د همدغو مهمو مسؤولیتونو د ترسره کولو لپاره د وزارت په تشکیل کې رامنځته شوی دی.
ورپسې د چارو ادارې لوی ریاست مرستیال، ښاغلي مولوي عبدالباري عاطف خبرې وکړې او زیاته یې کړه چې د اشغالګرو هېوادونو په مقابل کې د اسلامي امارت د بریا راز د مشرانو او مسؤولینو اطاعت دی او د امارت هېڅ مسؤول پر دنده د ټاکل کېدو او یا ورڅخه د لرې کېدو په اړه شکایت نه کوي، بلکې په بشپړ اخلاص او اطاعت سره خدمت ترسره کوي.
نوموړي همدارنګه د ارشاد، حج او اوقافو په برخو کې د وزارت د هڅو او خدماتو ستاینه وکړه او ورپسې یې د نوي مسلکي مرستیال د ټاکنې په اړه د عالیقدر امیر المؤمنین حفظه الله تعالی حکم ولوست.
تر هغې وروسته نوي مسلکي مرستیال، ښاغلي مولوي محمد حامد حسیب وینا وکړه او د اسلامي امارت د مشرتابه له عالي مقام څخه یې پر دوی د باور او اعتماد مننه وکړه او زیاته یې کړه چې د مساجدو غوره فعالیت، دمنبر او محراب مؤثره کارونه او د ملت سالم تربیت د ارشاد، حج او اوقافو وزارت مسؤولیت دی او کوښښ به کوو چې ددې دروند مسؤولیت د ترسره کولو لپاره د محترم وزیر صاحب د هدایت او د وزارت د نورو مشرانو او مسلکي ریاستونو په همکارۍ شپه او ورځ خدمت وکړو
