حرمینو شریفینو ته د ټولو افغان حاجیانو د لیږد بهیر په بریالیتوب سره پای ته ورسیده
شنبه ۲ ذوالحجة الحرام ۱۴۴۵ هـ ق (۱۹ جوزا ۱۴۰۳ هـ ش)
دغه الوتکه چې د افغانستان وروستي حاجيان پکې سپاره وو د کندهار له نړيوال هوايي ډگر څخه د جدې هوايي ډگر په لور الوتنه وکړه.
الحمدلله د افغانستان اسلامي امارت د ارشاد، حج او اوقافو وزارت سږکال په دې وتوانید چې د هېواد له پروازي زونونو (مرکز کابل، بلخ، هرات او کندهار) څخه د (۳۰) زره حاجیانو د لیږد بهیر د الوتنو له مهالوېش سره سم په ټاکلې موده کې بشپړ کړو او وروستۍ پرواز د کندهار له هوايي ډگر څخه سعودي عربستان ته ترسره شو.
د ارشاد، حج او اوقافو وزارت او د آریانا افغان او کام ایر هوايي شرکتو ترمنځ د حاجیانو د لیږد او رالیږد د هوکړې لیک له مخې؛ يادو شرکتونو د ذوالقعدې له لومړۍ نېټې څخه د ذوالحجې تر دويمې نيټې پورې د (۹۴) الوتنو په ترڅ کې په مساوي توگه افغان حاجيان د مرکزي زون، کندهار، بلخ او هرات له لارې سعودي عربستان ته انتقال کړي دي.
دغه راز پورتني شرکتونه به هم د حج له مراسمو وروسته محترم حاجيان بیرته هېواد ته را ستانه کړي.
د يادونې وړ ده چې سږ کال د ارشاد، حج او اوقاقو وزارت په سعودي عربستان (مدينې منورې او مکې مکرمې) کې ټول اړين سهولتونه لکه (سکن، غذا، روغتيايي کلينيکونه او مجهز ترانسپورټ) د افغان حاجیانو لپاره ترتیب شوي دي.
