د ارشاد، حج او اوقافو وزیر تر مشرۍ لاندې د هېواد د علماوو یو لوړ رتبه پلاوی ازبکستان ته ولاړ
شنبه ۶ رمضان المبارک ۱۴۴۵ هـ ق (۲۶ حوت ۱۴۰۲ هـ ش)
د ارشاد، حج او اوقافو محترم وزیر شیخ الحدیث سر محقق دکتور مولوي نورمحمد ثاقب تر مشرۍ لاندې د هېواد د علماوو لس کسیز عالي رتبه پلاوی د ازبکستان مسلمانانو د ادارې د مشر مفتي شیخ نورالدین خالق نظر په رسمي بلنه د دوه اړخیزو اړیکو او همکاریو د پیاوړتیا او په دیني او ښوونیزو برخو کې د دواړو هېوادونو د فعالیتونو د همغږۍ په موخه نن ازبکستان هېواد ته روان شول.
په دغه سفر کې به د هېواد د لوړ رتبه جیدو علماوو پلاوی د ازبکستان هېواد د تاشکند، بخارا او سمرقند ښارونو له دیني او اسلامي مرکزونو څخه د لیدنې سربیره د دغه هېواد د اسلامي بنسټونو له مسؤلینو سره په لاندې موضوعاتو خبرې وکړي:
- له اسلامي امارت او په ځانگړي توگه د ارشاد، حج او اوقافو وزارت سره د اړیکو ټینګښت، پراختیا او همکاري
- د دواړو هېوادونو (افغانستان او ازبکستان) د علماوو ترمنځ د اړیکو پراختیا او پرمختګ .
- د جوماتونو او مدرسو په برخو کې یو له بل سره همکاري او تجربی شریکول .
- د اسلامي میناتوری او سبک په برخه کې د معلوماتو ترڅنگ په یو لړ نورو برخو کې نظریات شریکول .
د یادولو وړ ده چې د ازبکستان هېواد د سمرقند، بخارا او ترمذ ښارونه کڼ شمېر ديني، علمي او تاریخي مرکزونه لري.
چې د اسلامي تمدن یوه لویه برخه جوړه وي، په سیمه او په ځانګړې توگه په منځنۍ اسیا کې د اسلامي تمدن او کلتور مهمه برخه بلل کېږي .
