د ارشاد، حج او اوقافو وزیر ختیځ زون ته د خپل سفر په ترڅ کې د لغمان ولایت له مسؤلینو سره وکتل

۲۲ ربیع الأول ۱۴۴۶هـ ق (۴ میزان ۱۴۰۳هـ ش)

د ارشاد، حج او اوقافو وزیر شیخ الحدیث قضاوتپوه دکتور مفتي نور محمد ثاقب او ورسره مل پلاوي ختیځ زون ته د خپل سفر په ترڅ کې د لغمان ولایت د ارشاد، حج او اوقافو له ریاست څخه په داسې حال کې لیدنه ترسره کړه چې دلغمان ولایت والي او د دې ولایت یو شمېر نورو مسؤلینو یې ملتیا کوله.

غونډه دقران كريم په تلاوت سره پیل شوه، د غونډې په پیل کې د لغمان ولایت والي شیخ شیر احمد حقانی خبری وکړئ نوموړي په خپلو خبرو کې د ارشاد، حج او اوقافو وزیر او ورسره مل پلاوي ته د ښه راغلاست ویلو ترڅنگ  وویل: الحمد لله په افغانستان کې اسلامي او شرعي نظام قایم دی او دغه نظام د ډیرو قربانیو په پایله کې راغلي، اوس په موږ لازمه ده، چې ساتنه یې وکړو.

هغه په خپلو خبرو کې زیاته کړه، د ارشاد،حج او اوقافو د وزیر صاحب حتیځ زون ته دغه سفر مجاهدینو په تشویق او د کارونو په ښه پرمخ بیولو کې خورا زیاته مرسته کوي او موږ ولایتي مسوولین متوجې کوي چې مشران زموږ کړنې له نږدې څاري.

همداراز نوموړي په خپلو خبرو کې وویل چې په لغمان ولایت کې د ټولو ادارو ترمنځ په لوړه کچه همغږي او همکاري موجوده ده او په ځانگړې توگه د ارشاد، حج او اوقافو ریاست کوشش کوي.

چې په حج، ارشادی، اوقافي برخو کې ولس ته پروخت او اړین خدامات وړاندې کړي.

ورپسې د ارشاد، حج او اوقافو وزیر خپله عالمانه وینا د غونډې ګډونوالو ته واوروله، نوموړي په خپلو خبرو کې د لغمان ولایت له مسؤلینو، علماء کرامو او مجاهدینو له کارونو او په دندو کې له اخلاصه څخه خوښي څرگنده کړه چې ټول مسؤلین په ډیره ایماندارۍ او صداقت سره خپلې دندې سرته رسوي.

ښاغلي ثاقب وویل، مونږ او تاسو باید الله ﷻ شکرگزاره وواسوو، چې په وطن کې مو شرعي نظام قایم دی او تر بل هر وخت د ولس او دولت ترمنځ فاصلې کمې شوې او اسلامي امارت له خپل ولس سره له نږدې کار کوي.

نوموړي د یاد ولایت مسؤلینو او منسوبینو ته په خطاب کې وویل: چې د افغانستان اسلامي امارت مشرتابه د ولایتي مسؤولینو کارونه او فعالیتونه څاري او دوی باید نور هم کوشش او هڅه وکړي چې خپل ورسپارل شوې دندې په پوره اخلاص، صداقت او روڼتیا سره ترسره کړي، او دوی باید ټولو هغو چارو ته جدي پاملرنه وکړي، چې د اسلام، هېواد او ولس په گټه وي.

همداشان د ارشاد، حج او اوقافو وزیر وویل: زموږ وزارت په ټول هېواد کې د حج، ارشادي، او اوقافي برخو کې خدمتونه ترسره کوي او لا هم هوډ لرو چې په دغو دریو یادشویو برخو کې پراخ خدمات خپل اولس ته وړاندي کړو.

غونډه د دعائیې په کولو سره پای ته ورسېده.