د کابل ولایت د بګرامیو ولسوالۍ اړوند قلعه حسن خان د دولت زیو په کلي کې لوی او مرکزي جامع جومات د لمونځ کوونکو پرمخ پرانېستل شو
۱۲رمضان المبارک ۱۴۴۶هـ ق (۲۲ حوت ۱۴۰۳ هـ ش)
د کابل ولایت د بګرامیو ولسوالۍ اړوند کوز قلعه حسن خان د دولت زیو په کلي کې د مسجد النُّور په نوم یو لوی او مرکزي جامع جومات جوړ او نن د یوې پرتمینې غونډې په ترڅ کې د لمونځ کوونکو پرمخ پرانېستل شو.
د دغه جومات د پرانېستې په مراسمو کې د ارشاد، حج او اوقافو وزیر شیخ الحدیث سرمحقق دکتور نور محمد ثاقب، د کورنیو چارو وزارت لومړی مرستیال مولوي محمد نبي عمري، د کابل ولایت والي امین الله عبید، ددې وزارت مرستیالانو مولوي عارف الله عارف، شیخ مولوي عزیزالرحمن منصور او شیخ الحدیث زرمحمد حقاني، جیدو شیوخو، علماء کرامو، د دولت زیو قومي مشرانو او د منطقې مخورو ګډون کړی وو.
غونډه د قرآن کریم د څو مبارکو آیتونو په تلاوت سره پیل شوه، ورپسې د ارشاد، جوماتونو او حُسینیو عمومي رئيس مولوي محمد اشرف حقاني میلمنو ته د ښه راغلاست ویلو ترڅنګ د یاد جومات په اړه تفصیلې او هراړخیز معلومات وړاندې کړل.
وروسته دارشاد، حج او اوقافو وزیر شیخ الحدیث سرمحقق دکتور نور محمد ثاقب د قرآن عظیم الشان او نبوي احادیثو په رڼاکې د جومات په فضیلت او همدارنګه په ټولنه کې د جوماتونو د جوړولو پر اهمیت او ارزښت مفصلې خبرې وکړې.
ښاغلی ثاقب وویل: دا جومات نه یوازې د یو قوم بلکې د دغې علاقې د ټولو ولسونو یو شریک جومات دی چې د سیمې خلک به په کې عبادت کوي او تاسو ټول باید کوښښ وکړئ چې دا جومات د الله په طاعت او عبادت سره آباد وساتئ.
ښاغلي ثاقب زیاته کړه چې د ارشاد، حج او اوقافو وزارت د هېواد په ټولو ولایتونو، ولسوالیو او لرې پرتو سېمو کې د پلان مطابق د جوماتونو جوړولو، ترمیمولو او تجهیزولو په برخه کې کار کوي.
چې د یو شمېر لویو جامع جوماتونو کار پای ته رسیدلی او د یو شمېر نورو د جوړولو چارې همدا اوس هم روانې دي.
نوموړي په خپلو خبرو کې له هغو اشخاصو څخه مننه وکړه چې د دې جومات د جوړېدو په چارو کې يې پوره استعانت او همکارۍ کړې ده.
ورپسې د کابل والي محترم امین الله عبید، محترم شیخ عزیزالرحمن منصور، محترم شیخ عزیزالله درویش، محترم شیخ نقیب الله او د سیمې د خلکو په استازولۍ یو تن قومي مشر د جوماتونو د جوړولو، بیا رغولو او په هغو کې د عبادت او تعلیم کولو په تړاو هر اړخیزې ویناوې وکړې، او زیاته يې کړه چې جوماتونه د عبادت او د دیني لارښووني ځایونه دي، ټول خلک باید د جومات په ابادولو او ښه حفاظت ساتلو کې ونډه واخلي او دوی زیاته کړه چې دغه جومات د سيمې په کچه لوی او مرکزي جامع جومات دی چې د دین او علم په خپرولو کې ترېنه باید ښه سالمه ګټه پورته شي.
د يادونې وړ ده چې دغه جومات په (۱۲۵۰) متره مربع ځمکه کې د (۴۲۰۲۴۹۳۱) دوه څلوېښت میلیونه، څلور وېشت زره، نهه سوه او یو دېرش افغانيو په لګښت سره په دریو پوړونو کې چې د ضرورت ټولې اسانتياوې لکه: د اودسونو ځایونه، تشنابونه ، د امام کور او داسي نورو ملحقاتو په لرلو سره په پاخه او اساسي ډول جوړ شوی دی، چې په يوه وخت کې له(۲۲۰۰) تنو څخه د زیاتو لمونځ کوونکو ظرفیت لري.
