د هیواد حاجیانو ته د مدینې منورې د زیارتونو او مبارکو ځایونو ورپیژندنه.
۴ ذوالقعدة ۱۴۴۴ هـ ق (۳ جوزا ۱۴۰۲ هـ ش) نن سهار د زرو تنو حاجيانو څخه زیات چې مدينې منورې ته په خیر سره رسيدلي دي، دوی په ډلیزه توګه د عصري بسونو په واسطه د دې ښار زیارتونو او مبارکو ځایونو ته د زیارت اداء کولو لپاره ولیږدول شو. د قباء جومات، د قبلتين جومات، اووه جوماتونه (خندق)، د غزوه احد د شهيدانو زيارت د مدينې منورې له مبارکو ځايونو څخه دي، چې هر مسلمان یې په لیدلو سره حضرت محمد صلی الله علیه وسلم او د هغه د یارانو او اصحابو یادونه کوي، حاجیان په ډیرې لیوالتیا او ژورو احساساتو سره پورتنیو ځایونو ته لاړل او د هغو په اړه یې له نږدې څخه معلومات ترلاسه کړل. د حاجیانو معلمینو د پورتنیو ځایونو د پېژندنې په ترڅ کې د یادو سیمو په اړه حاجیانو ته هر اړخیز معلومات ورکړل او ټولو حاجیانو د شکرانې د لمانځه په اداء کولو سره د هیواد د سوکالۍ او د افغانستان اسلامي نظام د لا ټینګښت لپاره دعا وکړه. د یادونې وړ ده چې په هیواد کې د نورو حاجیانو لپاره د مبارکو ځایونو د معرفي کولو پروسه په ترتیب سره ترسره کیږي.
