د ارشاد، حج او اوقافو وزارت له لوري د هېواد په (۲۶۰) لویو نظامي مرکزونو کې د قرآن عظیم الشان د ترجمې او تفسیر دورې نن پای ته ورسيدې.
پنجشنبه ۲۵ رمضان المبارک ۱۴۴۵ هـ ق (۱۶ حمل ۱۴۰۳ هـ ش)
د افغانستان اسلامي امارت د ریاست الوزراء د حکم پر اساس د ارشاد، حج او اوقافو وزارت تر مشرۍ لاندې په (۲۶۰) لویو نظامي مرکزونو کې او دغه راز په ملي راډیو تلویزیون کې په پښتو او دري ژبو د قرآن کریم د تفسیر او ترجمې دورې، چې د ۱۴۴۵ هجري قمري کال د شعبان المعظم میاشتې په لومړۍ نېټه پیل شوې وې، د رمضان المبارک میاشتې په ۲۵ مې نېټې سره د هېواد په ټولو نظامي مرکزونو او ملي راډیو تلویزیون کې پای ته ورسیدې.
د یادونې وړ ده چې د اسلامي امارت د راتگ څخه وروسته دا دریم ځل دی چې د شعبان او رمضان په میاشتو کې د هېواد په سطح په ټولو لویو نظامي مرکزونو او په ملي راډیو تلویزیون کې د ترجمې او تفسیر دورې تر سره کېږي او سږکال هم په (۲۶۰) لویو نظامي مرکزونو کې د قرآن عظیم الشان ترجمې او تفسیر دورې ترسره شوې، چې په دغو مرکزونو کې زرگونه تنو مجاهدینو او د اسلامي امارت مسؤلینو گډون کړی وه.
