د هېواد په کچه د قرآن کریم د حفظ، تجوید او سبعه قراءاتو عمومي سیالۍ پیل شوې.

۲۹ ربیع الثاني ۱۴۴۵هـ ق (۲۲ عقرب ۱۴۰۲هـ ش)

د ارشاد، حج او اوقافو وزارت د هېواد په کچه د قرآن کریم د حفظ او تجوید دولسمه دوره او د سبعه قراءاتو لومړی دوره سیالۍ د مرکزي زون د حاجیانو په مجتمع کې د وزارت د رهبرۍ غړو په ګډون پیل کړې، د دغو سیالیو موخه د هېواد په کچه د ممتازو قاریانو موندل دي، تر څو په نړیوالو سیالیو کې د افغانستان ښه استازولي وکړي.

یادې غونډې ته د ارشاد،حج او اوقافو وزارت مالي او اداري عمومي رئیس مولوي عبدالولي حقاني وینا وکړه، نوموړي د قرآن کریم د حفظ کولو په ارزښت او په ټولنه باندې یې د مثبتو اغېزو د پریښودلو په تړاو مفصلې خبرې وکړې، او زیاته یی کړه، قرآن کریم د محمد (ﷺ) یوه لویه معجزه ده او دغه معجزه به تر قیامته پورې وي.

د وزارت د قاریانو چارو رئیس مولوي عبدالغفار ثاقب هم په خپل واره سره د غونډې ګډونوالو ته د سیالیو په تړاو معلومات ورکړل، نوموړي وویل: څو ورځې وړاندې په ټولو ولایتونو کې د قرآن کریم د حفظ، تجوید او سبعه قراءاتو عمومي سیالۍ ترسره شوې.

چې له هر ولایت څخه ممتاز قاريان مرکز کابل ته معرفي شول، چې ټولټال (۵۰) تنه حافظان کېږي او اوس به په مرکز کابل کې د دوی ترمنځ سیالۍ ترسره شي چې د دوی ترمنځ به اول، دویم دریم نمره وټاکل شي او دغه ټاکل شویو ممتازو قاریانو ته ستاینلیکونه او نغدې جایزې هم په نظر کې نیول شوي.

غونډه د حج، عمرې او زیارت عمومي رئیس مولوي عطاء الله خادم په دعا کولو سره پای ته ورسېده