د کابل ولایت د بګرامیو ولسوالۍ اړوند د قلعه حسن خان د دولت زیو په کلي کې د یو محراب جامع جومات د جوړیدو بنسټ ډبره کېښودل شوه.
۱۳ جمادي الثانیة ۱۴۴۵ هـ ق (۵ جدي ۱۴۰۲ هـ ش)
د کابل ولایت د بګرامیو ولسوالۍ اړوند د کوز قلعه حسن خان د دولت زیو کلي کې د یو محراب جامع جومات د جوړيدو بنسټ ډبره کېښودل شوه.
د بنسټ ډبرۍ ایښودلو په مراسمو کې د ارشاد، حج او اوقافو وزیر شیخ الحدیث دکتور سر محقق مولوي نور محمد ثاقب، د چارو ادارې د پالیسي او نظارت مرستیال مولوي عبدالولي حقاني، ددې وزارت مسلکي مرستیال شیخ الحدیث مولوي زر محمد حقاني، مرکزي ریاستو رئیسانو، د رودات میهن ساختماني شرکت مسئولینو، د دولت زیو د قوم مشرانو، علماء کرامو او ځاي وګړو ګډون درلود.
غونډه د قرآن کریم د څو مبارکو آیتونو په تلاوت سره پیل شوه، ورپسې د یاد وزارت د دیني تعلیماتو او تدریب ائمه رئیس مولوي محمد اشرف حقاني د دې جومات د جوړيدو په اړه ګډونوالو ته هر اړخیز معلومات وړاندې کړل.
وروسته دارشاد، حج او اوقافو وزیر محترم وزیر شیخ الحدیث دکتو. سرمحقق مولوي نورمحمد ثاقب د جوماتونو فضیلت، مقام او همدارنګه په ټولنه کې د جوماتونو د جوړولو او آبادولو فضیلت یې د قرآن کریم د مبارکو آیتونو او د رسول الله ﷺ د احادیثو په رڼا کې ګډونوالو ته بیان کړل.
نوموړي زیاته کړه، د ارشاد، حج او اوقافو وزارت هڅه کوي، چې د شته بودیجې په نظر کې نیولو سره د پراختیايي پلانونو په ځانګړي ډول د جوماتونو د جوړولو او ترمیم په برخه کې د هېواد په محرومو او لیرې پرتو کلیو کې جوماتونه جوړ کړي.
همدا شان د غونډې په لړ کې د ارشاد، حج او اوقافو وزارت مسلکي مرستیال شیخ الحدیث مولوي زر محمد حقاني د جوماتونو د ساتنې په اړه مفصلې خبرې وکړې.
ورپسې مولوي عبدالولي حقاني خبرې وکړې، نوموړي عبادت، ښوونه او روزنه، سوله، امنيت او د اسلامي ټولنې په اصلاح کې د جوماتونو رول خورا مهم وباله.
په همدې موخه د رودات ساختماني شرکت مسئول او یو تن قومي مشر حاجي غمي هم خبرې وکړې.
د غونډې په پای کې د ياد شوي جامع جومات د بنسټ ډبره د ارشاد، حج او اوقافو وزير له خوا کېښودل شوه.
د يادونې وړ ده چې دغه جومات به د (۴۲۰۲۴۹۳۱) دوه څلوېښت میلیونه، څلور وېشت زره، نهه سوه او یو دېرش افغانيو په لګښت درې پوړونو کې جوړېږي چې د ضرورت ټولې اسانتياوې به ولري لکه د اودس ځایونه، تشنابونه او د امام لپاره کور او په يو وخت کې به د (۲۲۱۵) تنو لمونځ کوونکو ظرفیت ولري.
