له هېواد څخه حرمینو شریفینو ته د دېرش (۳۰) زره حاجیانو د لیږد بهیر په بریالیتوب سره ترسره شو
پنجشنبه لوموړي د ذوالحجې ۱۴۴۶ هـ ق مطابق ۸ جوزا ۱۴۰۴ هـ ش
د افغانستان اسلامي امارت د ارشاد، حج او اوقافو وزارت په هلو ځلو د هېواد له څلورو پروازي زونونو (کابل، بلخ، هرات او کندهار) څخه دیرش (۳۰)زره حاجیان چې پکې (۶۵۲) تنه د حاجیانو معلمین شامل وو، په بریالیتوب سره د آریانا افغان او کام ایر هوایی شرکتونو له لوري سعودي عربستان ته انتقال شول.
د ۱۴۴۶هـ ق کال د حج مبارکې فریضې د اداء کولو لپاره په هېواد کې دننه او له هېواد څخه بهر په سعودي عربستان کې ټولې چارې په منظمه، مؤثره او مسؤلانه ډول ترسره شوي دي، چې په دغو چارو کې د حاجیانو د د هستوګنې، مناسبه دري وخته غذا، معیاري ټرانسپورټ، ښه روغتیایي چاپیریال او دمناسکو اسانه اداء کولو لپاره لازمې اسانتیاوې موجودې دي.
همداراز د حج اړوند ټول قراردادونه د ارشاد، حج او اوقافو وزارت له خوا له دقیق پلان، څارنې او همغږۍ وروسته له اړونده شرکتونو سره لاسلیک او تطبیق شوي دي، چې له کبله یې حاجیانو ته یو منظم، ارام او د اطمینان وړ چاپېریال برابر شوی دی .
همداشان د حاجیانو د انتقال پروسه د افغانستان له څلورو پروازي زونونو څخه د منظم مهال وېش له مخې د روان کال د ذوالقعدې میاشتي په لومړۍ نېټه له مرکز کابل څخه پیل شوې وه او په ترتیب سره دغې لړۍ له کابل، مزار شریف، هرات او کندهار زونونو څخه په نورمال ډول مدینې منورې او مکې مکرمې ته دوام درلود، چې لله الحمد د ارشاد، حج او اوقافو وزارت وتوانید په یوه میاشت کې دننه د يادو شرکتونو له لوري د (۹۷)پروازونو په ترڅ کې پوره (۳۰) زره حاجیان له هیواد څخه سعودي عربستان ته انتقال کړي.
د یادونې وړ ده چې دغه محترم حجاج کرام به د حج د مناسکو له اداء کولو وروسته د ترتیب شوي تقسیم اوقاتله مخې د یادو هوایي شرکتونه له لوري بیرته هېواد ته را ستانه کړل شي، ان شاء الله .
