په مکه مکرمه کې د د ارشاد، حج او اوقافو وزارت مرستیال او د جنوب آسیا مؤسسې مسؤلینو ترمنځ د همغږۍ ناسته ترسره شوه
دوشنبه ۵ ذوالحجة الحرام ۱۴۴۶ هـ ق مطابق ۱۲ جوزا ۱۴۰۴ هـ ش
د افغانستان اسلامي امارت د ارشاد، حج او اوقافو وزارت مالي او اداري مرستیال مولوي عارفالله عارف او د حج بعثې مسؤلینو په سعودي عربستان کې د ضیوف البیت (جنوب آسیا) مؤسسې له مسوؤلینو سره لیدنه وکړه، دغه لیدنه د حج مبارکې فریضې د لا ښه تنظیم، د خدمتونو د همغږۍ او نورو اړوندو مهمو موضوعاتو د ارزونې په موخه ترسره شوه .
په دغه لېدنه کې د ارشاد، حج او اوقافو وزارت مرستیال وویل، موږ د ضیوف البیت (جنوب آسیا) مؤسسې له مسؤلینو سره رغنده او ګټوره لیدنه درلوده، په دې ناسته کې موږ د افغان حاجیانو لپاره د ښه خدمت، مشاعرو ته د منظم لیږد، حاجیانو ته درې وخته منظم خواړه، ټرانسپورټ او نورو مهمو برخو په اړه تفصیلي خبرې وکړې تر څو د سږ کال په حج کې زموږ د حاجیانو په ښه ډول خدمت ترسره شي.
همداشان د ضیوف البیت (جنوب آسیا) مؤسسې مسؤلینو د حاجیانو د خدمت په برخه کې د ارشاد، حج او اوقافو وزارت هڅې وستایلې او ډاډ یې ورکړ چې موږ به افغان حاجیانو ته د ترسره شویو ژمنو مطابق خپل خدمات وړاندې کړو او د حاجیانو د انتقال، استوګنې، تغذیې، او روغتیايي خدماتو په برخو کې به لازمې اسانتیاوې برابرې کړي او دوی ژمن دي چې د همکارۍ دغه لړۍ به د حج تر بشپړېدو پورې دوام ومومي.
د یادونې وړ ده، ضیوف البیت (جنوب آسیا) هغه قرادادي مؤسسه ده، چې د سعودي عربستان د شاهي دولت تر چتر لاندې فعالیت ترسره کوي او هر کال د حج په موسم کې د مختلفو هېوادونو حاجیانو ته په ځانګړي ډول د جنوبي آسیا له هېوادونو څخه راغلو حاجیانو ته اړین خدمات وړاندې کوي.
دغه مؤسسه د حاجیانو لپاره د استوګنې، خوړو، ټرانسپورټ، روغتیايي خدمتونو، تسکین او په مشاعرو (منیٰ، مزدلفه او عرفات) کې د تنظیم په برخو کې پراخ مسؤلیت لري
