ارشاد، حج او اوقافو وزارت لخوا د رمضان المبارک په میاشت کې د پام وړ فعالیتونه جریان لري
یکشنبه، ۵/رمضان المبارک/۱۴۴۷هـ ق، مطابق ۳/حوت/۱۴۰۴هـ ش
د ارشاد، حج او اوقافو وزارت لخوا د رمضان المبارك میاشتې د درناوي، د مسلمانانو په ژوندانه کې د دغه مبارکې میاشتې د اهمیت، د دیني شعائرو د اِحیاء، د ټولنې د فکري او اخلاقي ارزښتونو د لا پیاوړتیا او هېوادوالو ته په منظمه توګه د دیني خدماتو د وړاندې کولو په موخه، د کابل ښار د دوه ویشتو (۲۲) ناحیو علاوه د هېواد د څلور دیرشو (۳۴) ولایاتو په سلګونو محرابه جامع، لویو او مشهورو مساجدو کې، د تراویح په لمونځونو کې د قرآن کریم ختمونو د اداء کولو لپاره درې زره او څلور سوه (۳۴۰۰) تنه ممتاز قاریان او فاتحین د امتحان له لارې ګمارل شوي دي، څو د قرآن کریم د نزول په دغه مبارکه میاشت کې د قرآن کریم د ختمونو له لارې د هېواد مسلمان او متدین ولس د الهي کلام له فیوضاتو، برکاتو او انوارو څخه برخمن او د دوی ترمنځ د اسلامي ورورولۍ او یووالي احساس لا پیاوړی او تقویه شي.
همداراز د ارشاد، حج او اوقافو وزارت د کابل ښار د ناحیو او ټولو ولایاتو لپاره د شرعي معلوماتو او فلکي حساباتو پر اساس د روژه ماتي او پیشلمي مهالویشونو د ترتیب، چاپ او توزیع ترڅنګ، د جوماتونو د منابرو له لارې د جُمعې په خُطبو کې د رمضان المبارک د فضائلو او مسائلو بیانولو ځانګړې لړۍ هم ترتیب او په لاره اچولې ده، چې د امامانو او خطیبانو له لوري به په منظم ډول هېوادوالو ته وړاندې کیږي لکه څرنګه چې هېوادوالو ته معلومه ده، دغه راز د ارشاد، حج او اوقافو وزارت د ټول هېواد په کچه په شعبان المعظم او رمضان المبارک میاشتو کې په څلور سوه او یوولسو (۴۱۱) لویو نظامي مرکزونو کې، د جیّدو علماوو او شیوخِ کرامو له لوري، د قرآن کریم د ترجمې او د تفسیر علمي او ارشادي دَورې په لاره اچولې دي، چې د ملي راډیو تلویزیون له لارې هم په دواړو ملي ژبو (پښتو او دري) کې په ژوندۍ بڼه په منظم ډول خپریږي، تر څو ټول هېوادوال ددغه الهي عظیم کتاب له معاني وو، هدایاتو او احکامو څخه مستفید او برخمن شي وزارت، د قرآن کریم د ترجمو او تفسیر د روانو دَورو د تعلیمي او تدریسي بهیر د ارزونې، له هغو څخه د څارنې او ښه تنظیم په موخه، د هېواد ټولو څلور سوه او یوولسو (۴۱۱) مراکزو ته چې یادې دَورې پکې روانې دي، ځانګړي علمي او نظارتي هیئتونه هم لیږلي دي.
همدارنګه وزارت د حج موسم په رانږدې کېدو سره د رمضان المبارک په میاشت هم کې د حج چارې په ګړندۍ او منظم ډول جاري ساتلې دي.
