د کب ۲۰مه،"د سولې او ښېرازۍ نیالګي" تر شعار لاندې ولمانځل شوه
۱۳۹۹کال د کب ۲۰مه – کابل
د نیالګیو کېنولو ملي کمپاین، نن د کب په ۲۰مه د کابل په قلعه مسلم کې د شاندارو مراسمو په لړ کې رسماً پیل شو چې پکې د ارشاد، حج او اوقافو وزارت مسلکی مرستیال، د چاپېریال ساتنې ملي ادارې عمومي رئیس شاه زمان میوندي، وزیرانو، د اړوندو ادارو معینانو، رئیسانو، مدني فعالانو، رضاکارانو او د سیمې مشرانو ګډون کړی وو.
د کمپاین په پيل کې د ارشاد، حج او اوقافو وزارت معین ډاکټر امین الدین مظفري وویل: دین زموږ اصلي او اساسي ادرس دی او موږ ته یې د نیالګیو کېنولو، د ونو او بوټو د اهمیت، ساتنې او پالنې په هکله جدي سپارښتنې کړې دي، په ډېرو احادیثو کې ټینګار شوی چې د نیالګیو کېنول صدقه دي، موږ ټول باید په ګډه خپل دیني مسوولیت ادا کړو.
مظفري ژمنه وکړه چې راتلونکې جمعه به په ټولو جوماتونو کې د نیالګیو کېنولو د اهمیت او ارزښت په اړه د ملا امامانو لخوا خلکو ته تبلیغ وشي.
د یادولو وړ ده چې نن د کب ۲۰مه په ټول هېواد کې د نیالګیو کېنولو ملي کمپاینونه پیل شول او د مختلفو برنامو په لړ کې به ۲۵ میلیون نیالګي کېنول شي.
