د ارشاد، حج او اوقافو وزیر د ۱۴۴۷هـ ق کال د حاجیانو د لېږد را لېږد په تړاو د هېواد د هوايي شرکتونو له مسؤولینو سره وکتل

سه شنبه، ۲۷/ جمادی الاولیٰ ۱۴۴۷ هـ ق مطابق ۲۷/ عقرب ۱۴۰۴ هـ ش د ارشاد، حج او اوقافو وزیر ښاغلي شیخ‌ الحدیث سرمحقق دکتور نورمحمد ثاقب د روان ۱۴۴۷هـ ق کال د حج پروسې د چمتووالي ، د اړوندو چارو د لاښه تنظیم او سعودي عربستان ته د حاجیانو د منظم لېږد رالېږد په تړاو، په خپل کاري دفتر کې د «آریانا افغان هوايي » شرکت له رئیس ښاغلي الحاج ملا بخت الرحمن شرافت او د «کام ایر هوايي » شرکت له معاون ښاغلي الحاج آتیلا کامګار سره جلا جلا کتنې ترسره کړې. ښاغلي وزیر  د دغو کتنو په پیل کې وویل : د الله جلّ جلا له شکر اداء کوو  چې د خپلواک نظام تر سیوري لاندې او د هېواد د امارتي او خصوصي شرکتونو له لارې د ملت خدمت کوو ، لله الحمد د اسلامي امارت له راتګ سره سم په تېرو څلورو کلونو کې توانېدلي یو چې افغان حاجیان پرته له کومې بهرنۍ همکارۍ د خپلو داخلي هوايي شرکتونو له لارې په معیاري او منظمه توګه انتقال کړو ، په همدې موخه د یادو شرکتونو د موفقیت، مسؤلانه فعالیت او د حاجیانو په منظم لېږد رالېږد کې د هغوی د نه ستړې کېدونکو هڅو ستاینه کوو. د ارشاد، حج او اوقافو وزیر زیاته کړه ؛ وزارت په هېواد کې دننه او په سعودي عربستان کې د راتلونکي حج د پروسې د ښه تنظیم په موخه یو لړ مهم او عملي اقدامات پیل کړي دي چې له هغو اقداماتو څخه اساسي برخه یې سعودي عربستان ته د حاجیانو د خوندي، ډاډمن او منظم لېږد رالېږد بهیر دی او په همدې اساس د یادو شرکتونو له مسؤولینو سره د شرکتونو د ظرفیتونو، تخنیکي چمتووالي او د حج د پروسې لپاره د هر اړخیزې تیارۍ په اړه مفصلې خبرې وشوې. ښاغلي وزیر همدارنګه د خبرو په دوام کې وویل ؛ ولس پر مونږ حق لري او مونږ هم ژمن یو چې د خپلو امکاناتو  او شته ظرفیتونو مطابق د دوی خدمت وکړو او د ستونزو په حل کې یې خپله توانمندي وکاروو. دغه راز د هېواد ټولو متخصصو ، مسلکي او اهل فن کادرونو ته په کار ده چې د ولس په خدمت کې خپل مسؤولیتونه په پوره اخلاص، صداقت او امانتدارۍ سره ترسره کړي. ورپسې د آریانا افغان او کام ایر هوايي شرکتونو مسؤولینو د ښاغلي وزیر صاحب له لارښوونو، هڅونو او ملاتړ څخه مننه وکړه او څرګنده یې کړه، چې د افغانستان امارتي او خصوصي هوايي شرکتونه د هېواد له بنسټونو څخه دي او په هر ډول حالاتو کې به د خپلو ټولو امکاناتو، تخنیکي ظرفیتونو او کاري ټیمونو په مرسته، د خپلو هېوادوالو او په ځانګړې توګه د حاجیانو د لېږد رالېږد په برخه کې په پوره اخلاص سره خدمت کوي. ښاغلي وزیر وویل ؛ وزارت ژمن دی چې روان کال هم حاجیانو ته د مطمئن او هوسا حج اداء کولو لپاره لازمې اسانتیاوې برابرې کړي او د حاجیانو لېږد رالېږد ، په مکه مکرمه، مدینه منوره او مقدسو مشاعرو کې د هغوی د هستوګنې، په حرمینو شریفینو کې د پنځه وخته لمونځونو د اداء کولو د ځمکني ترانسپورټ، د درې وخته غذاء د تهیه کولو ، روغتیایي پاملرنې او په نورو اړینو برخو کې معیاري خدمات وړاندې کړي.