د افغان حاجیانو لومړنی کاروان سعودي عربستان ته ورسېد
۱/ ذوالقعده/۱۴۴۷هـ ق، مطابق: ۲۹/حمل/۱۴۰۵هـ ش
د افغان حاجیانو لومړنی کاروان، چې د ننګرهار ولایت (۳۴۶) تنه حجاج پکې شامل وو او د کابل له نړیوال هوايي ډګر څخه یې نن سهار په ۳:۳۰ بجو د کام ایر هوايي شرکت پر مټ الوتنه کړې وه، د سهار په ۸:۰۰ بجو د مدینې منورې هوايي ډګر ته ورسېد.
د یادو حجاج کرامو د استقبال او ښه راغلاست لپاره په ریاض کې د اسلامي امارت سفیر، ښاغلي شیخ عبد الفتاح حقاني، د اسلامي همکاریو د سازمان او جدې قونسلګرۍ استازو، د مکې مکرمې او مدینې منورې د حج قونسلانو او له وزارت څخه د لېږل شوو کاري کمېټو مسؤولینو ګډون کړی ؤ.
یاد حجاج کرام د اړوندو کاري کمېټو له لوري د مدینې منورې حرم شریف د مرکزي ساحې په نیول شوو عمارو (تعمیرونو) کې په منظم ډول ځای پر ځای شول. دوی به هلته په نبوي حرم شریف کې د اته (۸) شپو او ورځو په جریان کې څلویښت (۴۰) لمونځونه اداء کړي او ددې ترڅنګ به د حج بعثې او اړوند کمېټو له لوري د جوړ شوي پلان له مخې مقدسو ځایونو او زیارتونو ته ولېږدول شي.
